Sailburuak alarmismoetan ez erortzeko eskatu du, eta iraungitako txertoak segurtasunerako mehatxu ez direla ziurtatu du

Alberto Martinez Osasun sailburuak iraungitako txertoen kontuan "alarmismo behartuetan" ez erortzeko eskatu die oposizioko alderdiei, eta osasunerako ez zela inongo arriskurik izan berretsi du. 

Martinezek Eusko Legebiltzarreko kontrol saioan erantzun die oposizioak gaiaren inguruan egindako galderei. 

Sailburuaren esanetan, intzidentzia "bideratuta" dago, eta inoiz gertatu behar ez zuen zerbait izan dela onartu ondoren, esan du "xehetasun osoz" ari direla gertatutakoa aztertzen eta halakorik "berriro inoiz gerta ez dadin" ezarri beharreko neurri zuzentzaileak ezartzen. 

"Osasunerako arriskurik ez"

Martinezek behin baino gehiagotan azpimarratu du iraungitako txertoak inokulatzeak ez zuela txertatutako pertsonen osasuna arriskuan jarri, ez helduena, ez haurtxoena. "Segurtasuna guztiz bermatuta egon da une oro", esan du. 

Sailburuak nabarmendu duenez, Osasun Sailak iraungitako txertoak inokulatu zirela jakin zuenetik, familiei gertatutakoaren berri eman aurretik osasun-segurtasunerako arlo desberdinen artean "irizpide zehatz bat" lortzea izan zen lehentasuna. 

Oskidetzaren kudeaketa "edozein osasun-intzidentziaren kudeaketan izan beharreko printzipioekiko koherentea" izan dela adierazi du, "zehaztasuna, segurtasuna, zuhurtzia, ardura, proaktibotasuna eta gardentasuna" ardatz nagusi direla. 

Martinezek bere "harridura" agertu du, kontrol saioan gaiaz galdetu dionetako bat Rebeka Ubera (EH Bildu) izan delako, "informazioa zuzena eta lehen eskukoa" jaso zuen arren, Martinezek berak egin zion dei baten bidez, sailburuaren hitzetan. 

Ubera, bere aldetik, kezkatuta agertu da balio ez zuten txerto batzuen ondorioz "haur batzuk babes gabe" egon zirelako, bai eta Osakidetzako profesionalak "seinalatuak" izaten ari direlako, kasu honetan "bigarren biktima" bilakatuta, bere ustez. 

Uberaren esanetan, gorabehera honek agerian utzi du Osakidetzak beste kudeaketa-eredu bat behar duela, "marketin gutxiago" izango duena eta "egiturazko arazoak konpontzera bideratua". 

Pradales: "Zehaztasunez"

PPk zerbitzu publikoen "gainbeheraz" egindako beste galdera baten harira, Imanol Pradales lehendakaria ere txertoez aritu da, eta Osasun Sailaren eta Osakidetzaren jokabidea babestu du, "zehaztasunez" jardun zirelako. 

Pradalesek gertatutakoren larritasuna aitortu du berriro, eta, horren esanetan, horrexegatik eskatu zuten, bai berak, bai sailburuak, barkamena, gizarteari, oro har, eta familiei, bereziki. 

Lehendakariak Javier De Andres Euskadiko PPko buruaren jarrera gaitzetsi du, "susmoak piztu" eta "alarmismoa eta mesfidantza sortzeagatik, inongo oinarririk gabe", eta osasun-hedabide espezializatu batek emandako titularra gogorarazi dio. Horren arabera, sailburuaren jardunbideak agerian uzten zuen "deontologia medikoa eta politika bateragarriak" direla. Horren harian esan dionez, PP "tematuta dago demagogia eta politika ere bateragarri direla frogatzen". 

Jon Hernandez Sumarreko legebiltzarkidearen kritikei ere erantzun die Pradalesek. Ontzat jo du oposizioa Eusko Jaurlaritzarekin zorrotz izatea, baina eskatu dio Jaurlaritzarekin bezain zorrotza izan dadila Osasun Ministerioan bere alderdiak egiten duen kudeaketarekin. 

Lehendakariaren hitzetan, "Osasun ministroa" medikuen greba hauspotzen ari da, "medikuen adostasunik gabeko estatutu-markoa" onartu duelako, eta gogorarazi du Jaurlaritzak zain jarraitzen duela, ea Osasun Ministerioak noiz erantzuten dien Jaurlaritzak mediku faltari aurre egiteko egindako zortzi proposamenei. 

Voxeko Amaia Martinezek esan du txerto horiek "zaurgarritasun immunitarioa" eragin zietela dozenaka haurri, eta kasuak agerian uzten duela Osakidetzan "benetako anabasa" dagoela, "osasun politika oso txarra" duelako.