Eskuinaren garaia amaitzen ari dela eta Bartzelonan aro berria hasi dela aldarrikatu du Sanchezek

Pedro Sanchez Espainiako Gobernuko presidenteak "ezkortasuna eta etsipena" eragiten duten eskuinaren eta ultraeskuinaren aurrean, ezkerraren "harrotasuna" aldarrikatuz eman dio amaiera  'Global Progressive Mobilisation' progresisten goi-bilerari larunbat honetan.

5.000 laguneko auditorioaren aurrean, Lula da Silva Brasilgo presidentea eta Tim Walz Minnesotako gobernadorea ondoan zituela, "batasun" mezua zabaldu du Sanchezek.

"Indar aurrerakoien, herrialdeen eta belaunaldien arteko batasuna, mundu hobea berreskuratzeko", esan du. Izan ere, mundu osoko ezkerreko buruzagiekin batera, bi eguneko topaketa egin dute Bartzelonan, Donald Trump AEBko presidenteari alternatiba bat eskaintzeko.

Walz Minnesotako gobernadoreak Trump kritikatu du Irango gerragatik: "Mehatxurik ez zegoen gerra batean murgildu gintuen" salatu du, baina ohartarazi du, halaber, "autoritarismoa ez dela Estatu Batuetara mugatzen, leku guztietan dagoela" eta haren aurka borrokatzearen alde egin du.

Espainia ez da "xenofobiaren ama" izango

Sanchezek beren ideiak defendatzeko eskatu die bertaratuei, oparotasunaren banaketa, ingurumenaren babesa, zerbitzu publikoen defentsa eta gizonen eta emakumeen arteko berdintasuna, besteak beste.

Ildo horretan, bere gobernuak bultzatu duen milioi erdi migratzaileren erregularizazioa aldarrikatzeko aprobetxatu du, eta gogor kritikatu du oposizioa: "Eskuinari eta ultraeskuinari esan nahi diet Espainia migrazioaren alaba dela eta ez dela xenofobiaren ama izango".

Demokraziaren defentsa

Goizean, hasiera ekitaldian, Espainiako Gobernuko presidenteak ekintzarako deia egin du, demokrazia defendatzeko bidean. Hogei bat buruzagi progresista aurrean zituela, gerraren, berdintasun ezaren eta desinformazioaren hedapenaren aurkako mezua zabaldu du. 

Besteak beste, Brasilgo presidente Lula da Silva, Mexikoko presidente Claudia Sheinbaum, Kolonbiako presidente Gustavo Petro eta Hegoafrikako presidente Cyril Ramaphoosa izan dira topaketan. Horien aurrean esan du Sanchezek demokrazia ezin dela "egintzat eman", horrek arriskuak dakartzalako.

"Sistema multilateralaren aurkako erasoak ikusten ditugu, nazioarteko zuzenbidearen arauak inpugnatzeko saiakerak eta indarraren erabileraren normalizazio arriskutsu bat, eta gure gizarteetan bersintasun eza eta desinformazioa haziz doaz", adierazi du goi bileraren irekieran.

NBEren erreforma

Sanchezen ustez, nazioentzat arriskutsua da "demokrazia pixkanaka barrutik husten joatea, kanpotik erasotzen zaion bitartean". Hori dela eta, ohartarazi du erantzuna ezin dela soilik babestea izan. "Ez da nahikoa eustea, proposatu beharra daukagu, eta erakutsi behar dugu demokrazia defendatzea ez dela nahikoa, alegia, indartu eta biribildu beharra dagoela", azpimarratu du.

Luiz Inacio Lula da Silva Brasilgo presidenteak, berriz, bakea bermatzeko eskatu die NBEko Segurtasun Kontseilua osatzen duten bost herrialdeetako presidenteei (Estatu Batuak, Txina, Errusia, Frantzia eta Erresuma Batua): "Jainkoaren izenean, bete dezatela munduan bakea bermatzeko duten betebeharra".

Era berean, Segurtasun Kontseiluaren bilera bat deitzeko eskatu die bost herrialde horiei, "gerren erokeria horrekin amaiitzeko, munduak ezin baitu gehiago jasan".