Iritsi dira Mondragon Taldeak milioika maskara ekoizteko hiru makinak

Osasun arloko babes materiala eta maskarak egiteko lau makina dituen hegazkina ostiral arratsaldean iritsi zen Madrilera Shanghai hiritik (Txina). Makina horietako hiru Mondragon Korporazioko kide den Bexen Medical kooperatiba gipuzkoarrarentzat izango dira, eta laugarrena Defentsa Ministerioak Burgosen duen farmazia zentroan erabiliko dute.

Ildo horretatik, hilero 10 milioi maskara kirurgiko ekoiztea aurreikusi du Bexen Medical enpresak. Horrela, Hernanin egoitza duen konpainia hori Estatuko maskara-fabrikarik garrantzitsuena izango da.

Carlos Arsuaga Bexen Medicaleko zuzendari nagusiak azaldu duenez, enpresak osasun arloko hainbat produktu ekoizten ditu, baina ez maskarak. Dena dela, sektorean 42 urtetik gorako esperientzia dutenez, Medikamentuen Espainiako Agentziako zuzendari nagusia berarekin harremanetan jarri zen martxoaren 13an, maskarak, mantalak eta babes sanitarioko gainerako materiala ekoitzi ote zezaketen galdetzeko.

Testuinguru horretan, Bexen Medicalek ez dituela horrelako produktuak ekoizten esan zion Arsuagak, baina fabrikatzaile gisa enpresak duen esperientzia haren esku uzteko prest agertu zen, eta jakinarazi zion Mondragon Korporazioko beste enpresa batek, Mondragon Assembly (Aretxabaletan du egoitza), maskarak ekoizteko makinak egiten dituela Txinan.

Alabaina, Txinako produktuak merkatuan erosteko egun dauden zailtasunen berri eman zion Industria, Merkataritza eta Turismo Ministerioko ordezkariak Bexen Medicaleko arduradunari, eta estrategikoki maskarak estatuan bertan ekoizteko beharra dutela.

Hilaren 21ean Espainiako Gobernuarekin akordioa lortu ostean, maskarak ekoizteko lau makina egin ditu Mondragon Assemblyk; Defentsa Ministerioarentzat bat, eta Bexen Medicalentzat beste hirurak, Hernaniko enpresak maskarak egin ditzan.

Arsuagaren esanetan, 2R motako maskara kirurgikoak ekoitziko dituzte. Hiru geruza dituzte, eta osasun arloan erabili ohi diren maskara kirurgikoen artean babes handiena dutenak dira. Hala ere, maskarak osatzen dituzten hiru lehengaietako bat aurkitzea "oso zaila" izaten ari dela aitortu du.

"Errusian hornitzaileak daude, baina Errusiako agintariek ez dute lehengai hori herrialdetik ateratzeko baimenik ematen, haiek behar dutenerako. Turkian eta Txinan ere hornitzaileak daude, baina, nolanahi ere, gertatzen ari den guztiarekin gainezka eginda daude", esan du Arsuagak.

"Estatuko maskara-fabrikatzaile handiena"

Zailtasunak zailtasun, makinak Euskal Herrira ekarri eta beharrezko lehengaiak lortzeko lanean jarraitzen dutela azaldu du Arsuagak. "Dena ondo badoa, ziurrenik apirilaren amaieran maskara kirurgikoak ekoizten has gaitezke, eta, dena ondo badoa, hilean 10 milioi inguru ekoitzi ahalko ditugu, hiruzpalau txandatan lan eginez. Horrela, Estatuko maskara-fabrikatzaile garrantzitsuena izango gara", gaineratu du.

Hala, lantokia egokitzen dutenean, ahalik eta denbora gutxienean, ahalik eta maskara gehien ekoiztea da Bexen Medicalen nahia. Horrela, aldi berean hiru makinekin izango dira lanean, eta 20 lanpostu inguru sortzea aurreikusten dute.