"Eten labur eta selektiboak" egingo ditu ArcelorMittalek Bergarako eta Olaberriko lantegietan
Argindarraren kostua dela eta, ekoizpenean "eten labur eta selektiboak" egitea erabaki du ArcelorMittal altzairugintzako multinazionalak bere lantegi batzuetan, argindarraren kostu handiarengatik. Neurri horrek zuzenean eragingo die Bergara eta Olaberriko lantegiei.
Europako beste lantegi batzuetan hasiak dira dagoeneko etenak egiten, argindarraren prezioak eragin handiena duen ordu jakinetan.
ArcelorMittal Europa enpresaren erabakiak altzairutegi elektrikoetan produktu luzeak ekoizten dituzten lantegiei baino ez die eragiten, hori da Bergara eta Olaberriaren kasua (ekoizpen gune bakartzat du multinazionalak), eta 510 langilek egiten dute lan bertan.
Olaberriko altzairutegiak eraikuntzarako profil ertainak ekoizten ditu, eta Bergarakoak, aldiz, Olaberritik iristen zaion produktua prozesatzen du eta profil arinak ekoizten ditu, horiek ere eraikuntzarako.
Konpainiak onartu du "eten labur eta selektiboak" egin behar izan dituela produktu jakin batzuk ekoizten dituzten arku-labe elektriko batzuetan, eraikuntzarako lan egiten dutenak oro har.
ArcelorMittalek azaldu duenez, neurri honekin aurre egin nahi diote energiaren prezioaren eguneroko ezegonkortasunari, "erronka itzela baita egoera honetan altzairua ahalik eta modurik merkeenean ekoiztea". Hala ere, ez du uste neurri honek ekoizpen bolumenean edo bezeroen eskaerari erantzuteko gaitasunean eragin handirik izango duenik.
Neurriak ez du eraginik izango altzairutegiak Euskal Herrian dituen gainerako lau lantegietan: Zumarragakoan (txatarra banatzen du), Etxebarrikoan (latorria eta txapa ekoizten ditu), Sestaokoan (altzairutegi elektrikoa izan arren, produktu lauak ekoizten dituena; beroan ijeztutako bobinak, hain zuzen), eta Lesakako lantegian (produktu galbanizatuak eta aurrelakatuak ekoizten dituena).
Erabakiak ez du eraginik izango Gijongo eta Avilesko (Asturias) lantegietan ere. Horietan 5.000 lagunek egiten dute lan, Espainiako Estatuan altzairutegiak guztira dituen 8.000 langiletako erdia pasatxo.
Euskal Herriko eta Asturiasko lantegiez gain, Espainian dituen beste lantegiak Pedrolan (Aragoi), Sagunton (Valentzia) eta Villaverden (Madril) daude. ArcelorMittalek Europan urtean 40 milioi tona altzairu ekoizten ditu, horietatik 10 eraikuntzaren sektorerako.
Albiste gehiago ekonomia
Jaurlaritzak bertan behera utzi du angula arrantzatzeko 2025-26ko kanpaina, espeziearen egoera "kritikoa" dela eta
Hainbat txostenen arabera, orain arte aplikatutako neurriek ez dute balio izan espeziearen egoera kritikoa lehengoratzeko, eta, horren aurrean, Arrantza Sailak espeziea berreskuratzeko neurriak indartzea erabaki du egoera atzeraezina izan baino lehen.
Medikuak kalera atera dira Estatutu Markoaren zirriborroaren aurka
Lan-baldintzak negoziatzeko mahai propioa exijitzen dute medikuek. "Guk diseinatu eta negoziatu nahi dugu, negoziazio-mahai horretan ordezkaritza ia nulua baitugu", adierazi du Ana Santorcuato Euskadiko Medikuen Sindikatuko ordezkariak.
Medikuak estatutu propioa eskatzeko greba egiten ari dira Estatu osoan
Osasun publikoko medikuek greba eguna dute gaur Estatu osoan. Euskadin, gainera, Euskadiko Medikuen Sindikatuak (SME) elkarretaratzeak deitu ditu hiru hiriburuetako ospitale eta anbulatorioetan.
Gasteizko lorezainak eta Enviser enpresa, akordioa lortzeko bidean
Bilera luzea izan dute ostegun honetan Precon, eta itxaropentsu irten dira. Langileak batzartuko dira eta enpresak dagozkion kontsultak egingo ditu, hurrengo bileran akordioa ixteko helburuarekin.
Lan-eskaintza publikoetan euskara blindatzeko EAJ eta EH Bilduren proposamena izapidetzea ahalbidetu dute
Eusko Legebiltzarrak bi lege proposamen izapidetuko ditu lan-eskaintza publikoetan euskara blindatzeko. EAJk bat aurkeztu du, eta PSE-EE gobernukideak ez, baina EH Bilduk babestu egin du. Koalizio soberanistak beste bat aurkeztu du, eta jeltzaleen abstentzioari esker aurrera atera da.
Irailean, langabezia-tasa % 2,02 jaitsi da EAEn, eta % 0,4, Nafarroan
2024ko iraileko datuen aldean, 1.027 langabe gutxiago (% 0,95) daude EAEn, eta 1.232 gutxiago (% 4,16), Nafarroan. Halaber, abuztutik irailera, Euskadiko Gizarte Segurantzan 11.475 lagun afiliatu dira; Nafarroan, aldiz, 719 pertsona gutxiago daude Gizarte Segurantzan izena emanda.
Alokairuen indizeak 500 euro baino gehiago jaitsi ditu Donostian eskainitako prezioak
Gipuzkoako herri tentsionatuetan, azken bost urteetan alokatuta egon ez diren edo lehen aldiz merkaturatu diren edukitzaile handien eta pisuen kontratu berriei bakarrik aplikatu beharko zaie prezio-tarte berria.
Eusko Jaurlaritzak Indartuz inbertsio funtsa sortuko du, eta 400 milioirekin hornituko du
Gainera, Finkatuz inbertsio funts publikoak estatutuak eguneratuko ditu enpresetan parte hartzeko irizpideak malgutzeko. Esaterako, ez da horretarako baldintza izango enpresak egoitza Euskadin izatea, eta nahikoa izango da lurraldean "eragina" izatea.
Mitxel Lakuntzaren arabera, CAFek Jerusalemen duen proiektua "ez da erabakigarria" enpresaren etorkizuna bermatzeko
ELAren idazkari nagusiak dioenez, "CAFek badaki tren hori hasieratik dela ilegala", eta proiektua babesteko eta "ilegalitatearekin jarritzeko argudio gisa darabilen txostena" egin duten adituak zeintzuk diren argitzeko eskatu dio enpresari. Euskadi Irratiko Faktorian hitz egin du asteazken goizean horren eta beste hainbat gairen inguruan.
Sindikatuek hiru orduko lanuztea eta hainbat manifestazio deitu dituzte euskal hiriburuetan, Gazako genozidioa salatzeko
Urriaren 15ean egingo duten lanuztearen berri eman dute LAB, CCOO, UGT, ESK, STEILAS, CGT/LKN, ETXALDE eta HIRU sindikatuek. Lanuzteak eta manifestazioak Espainiako Estatuko lantoki guztietan deitu dira.