ELAk salatu duenez, lehendakariaren errenten itunak "enpresen mozkinak babestu nahi ditu"

ELAk bere egoera sozioekonomikoaren azterketa aurkeztu du gaur, eta Mitxel Lakuntza idazkari nagusiak "Eusko Jaurlaritzaren eta Nafarroaren babesarekin patronala bultzatzen ari den langileriaren pobretze prozesua" salatu du. 

Mikel Noval ELAko Azterketa Bulegoko arduradunak aurkeztutako dokumentuaren datuetan oinarrituta egin ditu baieztapen horiek Lakuntzak, Leire Gallego Gizarte Ekintzako arduradunak aletu dituen proposamen zehatzekin batera.

Azaldu duenez, hitzarmenetako soldata igoerak inflazioaren oso azpitik daude, eta hortik dator soldaten debaluazioa. Izan ere, inflazioa % 10etik gora badago ere, "negoziatzen ari garen sektore guztietan, batez beste, % 3ko igoera proposatzen du" patronalak. Horrela, Lakuntzak salatu du, patronalak langileen erosahalmena % 7 murriztu nahi duela. Gaineratu duenez, halaber, hitzarmenen ia % 60 berritzeke daude, "patronalak nahikoa du hitzarmenen negoziazioak blokeatzea debaluazio hori gertatzeko". 

Buruzagi sindikalak adierazi duenez, "Eusko Jaurlaritzak eta Nafarroak hartutako neurriek enpresen interesei bakarrik egiten diete mesede, ez langile klaseari". 

Bestalde, Lakuntzak esan duenez, Urkullu lehendakariak proposatutako errenta itunak enpresa irabaziak babestu nahi ditu soldatak txikiagotzearen truke, eta horretarako Eusko Jaurlaritzak eta patronalak "estrategia partekatua" dute. Gogorarazi duenez, patronalak bezala, Lakuak ere % 2ko soldata igoera aplikatu die euren langile publikoei, KPItik oso urrun.

Mikel Novalek adierazi duenez, Ibex 35eko enpresek "marka guztiak hautsi zituzten 2021ean, 60.000 milioi eurotik gorako irabaziekin, aurreko bost urteetako batez bestekoa baino % 64 gehiago, pandemiaren urtea kontuan hartu gabe, eta hori gutxi balitz, 2022ko lehen seihilekoan ia % 8an hobetu dituzte irabaziak".

Leire Gallegok, bere aledetik, sindikatuak pobretze prozesua iraultzeko eta eredu ekonomikoa eta soziala errotik aldatzeko egiten dituen proposamenak aurkeztu ditu.

Bere hitzetan, "hitzarmenek KPIaren baliokidea den soldata igoera bermatu behar dute Gipuzkoako metalean, eraikuntzan edo lurralde bereko ostatu sektorea bezalako sektoreetan gertatzen ari den bezala". Gaineratu duenez, "gizarte prestazioetan hilean aplikatzen diren 250 eta 300 euro arteko murrizketak lehengoratu behar dira, elektrizitatearen, gasaren eta erregaien prezioa mugatu behar da, energia-eskubidea eskubide unibertsal gisa ezarri behar da gizarte-prezioan, garraio publikoaren prezioa etengabe murriztu behar da eta zerga erreforma egin behar da etekinen gaineko % 25eko gutxieneko tasa eraginkorra ezartzeko, salbuespenik gabe".