Ibilgailua ordezkatzeko 3.500 eurora arteko dirulaguntza iragarri du Eusko Jaurlaritzak

Mikel Jauregi Eusko Jaurlaritzako Industria sailburuak ibilgailuak erosteko laguntza sorta berri bat iragarri du. Hala, programak 5 milioi euroko hasierako inbertsioa izango du, 2.000 auto eta furgoneta ordezkatzeko helburuarekin. Laguntza 3.500 eurora artekoa izango da ibilgailua ordezteko.

Dirulaguntzak apirilaren 1etik aurrera eskatu ahal izango dira Energiaren Euskal Erakundearen (EEE) webgunearen bidez.

Zehazki, Eusko Jaurlaritzak, Industriaren Defentsarako Taldearen esparruan, "Gutxiago kutsatzen duten ibilgailuak" erosteko laguntza programa berri bat aurkeztu du, Energiaren Euskal Erakundearen bitartez bideratuko dena.

Jauregik azpimarratu duenez, "herritarrei emisio gutxiago sortzen dituzten ibilgailu berriak eskuratzen laguntzeko gai izan behar dugu, eta, aldi berean, automobilgintza sektorea babestu".

"Orain arte, Europaren apustua ibilgailu elektrikoa izan da, baina ez da espero bezala zabaltzen ari. Jendea bigarren eskuko auto baten aldeko apustua egiten ari da, eta ez auto elektriko baten alde. Eta auto zaharrak dituen ibilgailu parke batek ez du deskarbonizazioan laguntzen", gaineratu du.

Industria Sailak ohar batean zehaztu duenez, programak 3.500 eurorainoko laguntzak emango ditu egungo autoaren ordez ibilgailu berri bat jartzeko, 125 g/km baino gutxiagoko isuriak dituena turismoen kasuan, eta 150 g/km furgoneten kasuan. Ibilgailu zaharra txatarrerako uztea derrigorrezkoa da. Autoa ordezkatzearen ondoriozko CO2 isurien batez besteko murrizketa % 30etik gorakoa izango dela uste dute agintariek.

Ibilgailu horiek ordezkatzeak 24.000 tona CO2 inguru isurtzea saihestuko du 10 urtetan, hau da, EAEko 16.000 etxek sortutako karbono dioxidoaren isuriak adina.

Eusko Jaurlaritzak esan du elektrifikazioaren alde egiten jarraitzen duela errepideko garraioa deskarbonizatzeko bide nagusi gisa, baina laguntza berri horrekin "pauso bat eman du oraindik ibilgailu elektrikora jauzi egiteko erabakia hartu ez duten familiei laguntzeko".

Laguntza-programan sartzeko baldintzak

-Dirulaguntza jaso ahal izango dute ezaugarri hauek dituzten ibilgailuek edo furgonetek: elektriko puru eta hibrido entxufagarriak, autonomia hedatukoak, PGL (petrolioaren gas likidotuak), gas naturala, gasolina edo gasolioa, 125 g/km baino CO2 gutxiago isurtzen duten autoentzat, eta 150 g/km baino gutxiago isurtzen duten furgonetentzat.

-Ibilgailu berriaren gehieneko prezioa, oro har, ezin izango da 40.000 eurotik gorakoa izan autoentzat, eta 75.000 eurotik gorakoa hidrogeno-autoentzat.

-Laguntzak apirilaren 1etik aurrera egindako erosketei aplikatuko zaizkie, baldin eta egun horretatik aurrera erosketa osorik eginda eta ordainduta badago.

Donald Trump AEBko presidenteak abiatutako "merkataritza-gerra kaotikoak" mundu osoan eragin duen "ziurgabetasunaren" aurrean, EAEko enpresen "bidelagun" izan nahi du Eusko Jaurlaritzak, eta bide horretan, laguntza berriak iragarri behar zituela esan du goizean Jauregik.

Hain zuzen ere, gaur iragarri du Gasteizko Mercedes Benz lantegiak 122.634 ibilgailu ekoitziko dituela aurten, aurreko aurreikuspenean baino 2.000 gutxiago. Beherakadaren berri gaur eman die langileei Mercedes Benzek Gasteizen duen lantegiko zuzendaritzak, sindikatuetako iturriek baieztatu dutenez.