BSHko langileek protestei ekin diete, Ezkirozko lantegia itxi behar dutela jakin eta biharamunean

BSHk Ezkirozko lantegiaren itxiera iragarri eta biharamunean, 200 bat langilek protesta egin dute enpresa alemaniarraren aurrean eta zuzendariari sarrera eragotzi diete. Hilabete luzez negoziaziatzen aritu ondoren, enpresak astelehen honetan jakinarazi die langileei ez duela aurreikusitako epea luzatuko, langileek eta Gobernuak eskatutakoari entzungor eginez. Beraz, ekainaren 17an itxiko ditu ateak etxetresna fabrikatzaileak, Nafarroako lantegi handienetako batek, 655 langile lanik gabe utziz.

Espero zen, eta iritsi da. BSHk Ezkirotzen duen lantegiko beharginek bi urte baino gehiago zeramatzaten aldi baterako enplegu-erregulazioan. Aurretik, Alemaniako enpresak Etxarri Aranatzen eta Lizarran zituen lantegiak itxi zituen, eta orain, abenduaren 16an iragarritako mamua gauzatu egin da.

Goizean Nafarroako Gobernuarekin eta Industria Ministerioarekin bildu ondotik, bideodei bidez jakinarazi zien atzo goizean BSHko zuzendaritzak langileei ez zutela langileek eta Gobernuak eskatutako epea luzatuko, eta, hortaz, enpresa itxi egingo zutela. Gaur zortzi gauzatuko da kaleratze hori, eta langileen artean samina eta haserrea nagusi bada ere, besoak gurutzatuta geratu ordez, arazoari aurre egiteko hautua hartu dute, eta hasi dira dagoeneko lehen mobilizazioekin. 

Goizeko txandakoak izan dira lehenak planto egiten. Goizeko 06:00etan ziren lanera sartzekoak, baina lantegiaren aurrean jarri dira 200 bat langile, batasuna aldarrikatzen zuen mezua zeraman pankarta handi baten atzean, enpresa ez ixteko ohiuak eginez. Gainera, hil kutxak eta hilerriak jarri dituzte Eskirozko BSHren heriotza irudikatzeko.

Tentsio uneak ere bizi izan dira, lantegiko zuzendaria kotxearekin lantegira sartzen saiatu denean. Langileak lurrean eseri dira eta foruzainek horiek arrakasta altxatzen ahalegindu dira. Azkenean, zuzendaria ez da lantegira sartu. 

Atzo erabakiaren berri izan ondotik, orain bi dira BSHk Eskirozen duen lantegiko beharginen asmoa; batetik, enpresa ez ixtea eta, bestetik, euren kaleratzeak elkarrekin negoziatzea. Grebak ekainaren 20ra arte jarraituko du. 

Langileen ordezkaritza bat, Bruselan

Langileak protestan ari diren bitartean, langileen ordezkaritza bat Bruselan da Industria komisarioarekin eta Enplegu komisarioarekin bildura, berrindustrializazioa eta beste enpresa proiektu bat posible dela aldarrikatzeko.

Jarduerari eusteko aukerak

Maria Chivite Nafarroako Gobernuko presidenteak atzo prentsaurrekoan adierazi zuen erabateko akats dela BSH ixtea, eta aurreratu zuen Industria Ministerioarekin elkarlanean ariko dela lantegiaren jarduerari eusteko interesa agertu duten enpresekin harremanetan jartzeko. Horren arabera, badago lantegiaren jarduerari eusteko aukera.

Mikel Irujo Industriako sailburuak enpresaren "gizatasun falta" nabarmendu zuen, eta adierazi zuenez, BSHri denbora gehiago eskatu diote interesa duten inbertitzaile daudelako". Sailburuak azaldu duenez, urtarriletik lanean ari dira, aholkularitza enpresa baten laguntzarekin, eta "mundu osoko enpresa askorekin jarri dira harremanetan. Kontseilariaren ustez, etxetresna elektrikoen enpresak argi utzi du bere lehentasuna, eta bertan ez daude langileak.