CAFek dio Jerusalemgo trenaren proiektuak ez dituela "giza eskubideak urratzen"

Gipuzkoako CAF enpresak adierazi du ez duela "giza eskubiderik urratu" Jerusalemgo trenaren proiektuan, aitzitik, "herritarrei eragin positiboa ekarriko” diela, "aditu independenteen txostenek agerian utzi duten moduan".

CAFek komunikatu bat igorri du ostegun honetan, lehen aldiz, azken hilabeteetan trenbide-proiektu horretan parte hartzeagatik jaso dituen kritiken direla eta bere posizioa adierazteko.

Gipuzkoako enpresak gaineratu duenez, "konpromiso sendoa du enpresa-etikarekin eta giza eskubideen errespetuarekin bere proiektu guztietan, balio-katea barne".

Konpainiak adierazi duenez, "erabat jabetzen da Jerusalemgo proiektuari lotutako inplikazio juridiko eta etiko konplexuez, bereziki nazioarteko zuzenbide humanitarioari eta enpresen erantzukizunari dagokienez, eta giza eskubideen babesa kontu handiz orekatzearen garrantziaz, biztanleriari komunitate guztientzako funtsezko azpiegitura eskaintzeko beharraz, diskriminaziorik gabe".

Giza eskubideen gaineko eragina

Hori dela eta, azaldu du neurri espezifikoak aplikatu dituela azpiegitura horrek "giza eskubideetan eragindako edozein eragin kaltegarri identifikatzeko, prebenitzeko eta, hala badagokio, arintzeko".

CAFek egindako ebaluazioak zehaztu ditu, eta azpimarratu du orain arte ez dela "giza eskubideen urraketarik identifikatu, ezta kontrako eraginik gauzatu ere".

Aitzitik, Jerusalemgo proiektuak herritarrengan eragin "positiboak" sortzen dituela dio, "2023an eta berriro 2025eko uztailean egindako aditu independenteen txostenen bidez berretsi dena".

CAFen baieztapen hori ez dator bat Francesca Albanese NBEren Palestinarako kontalariaren azken txostenarekin. Izan ere, Albanesek Jerusalemgo tren arinaren proiektuan Gipuzkoako enpresak parte hartu izana gaitzetsi zuen, linea horrek "koloniak ezartzen eta zabaltzen" laguntzen duela iritzita.

Aitzitik, CAFen arabera, txosten independenteek, komunitateetako ordezkariei egindako bisiten eta elkarrizketen ondoren egindakoak, "Jerusalemgo tranbiaren onura soziala nabarmentzen dute, funtsezko zerbitzu publikoko azpiegitura baita, eta giza eskubideak betetzea katalizatzen baitu, hala nola mugitzeko askatasuna, eta enplegua, arreta medikoa, hezkuntza eta kultu-lekuak eskuratzea herritar guztientzat, bereizketarik gabe".

"Horregatik guztiagatik, txostenek ondorioztatzen dute proiektuak eragin positiboa duela, modu ez diskriminatzailean, oinarrizko gizarte-zerbitzuetarako sarbidea eskainiz eta azpiegitura jasangarri eta ekologikoa eskainiz", azpimarratu du euskal konpainiak.

Gainera, adierazi du eskura dauden mugikortasun-datuek baieztatzen dutela komunitate arabiarreko kideak direla tranbia gehien erabiltzen dutenak, eta gehienak zerbitzuarekiko gogobetetze-maila handienetan daudela, aldian-aldian egindako kalitate-inkesten arabera.

Israelekin dituen harremanak amaitzea eskatu diote sindikatuek

CAFen langileen batzordeak eta ELA sindikatuak "Israelgo Estatuarekin dituen harremanekin amaitzeko" eta proiektua bertan behera uzteko eskatu diote konpainiari.

Ohar batean, ELAk gogorarazi du sei urte daramatzala proiektuaren kontrako jarrera agertzen, hain zuzen, CAFek proiektuaren lizitazioan parte hartuko zuela jakin zuenetik, "Palestinako herriari elkartasuna adierazteko, proiektuaren diseinuak Israelek lurraldea legez kanpo okupatzen zuela agerian uzten zuelako".

Sindikatuak deitoratu du zuzendaritzak eskaerari "jaramonik egin ez" izana, eta gainera, "Tel Aviven proiektu berri baten esleipenarekin Israelgo Estatuarekin duen harremana areagotu” duela salatu du.

Amnistia Internazionala eta horren gisako erakundeek Beasainen egoitza duen enpresari eskatu diote utzi diezaiola berehala trenbide-sarearen zabalkuntzan parte hartzeari, Israelen legez kanpoko okupazioa sendotzea eta Jerusalem ekialdea kolonizatzea errazten duela iritzita.