ELAren arabera, Trapagarango Tubos Reunidoseko delegatuek "jada ez dute sindikatua ordezkatzen"

Amurrioko eta Trapagarango Tubos Reunidoseko lantegietan ordezkaritza duten sindikatuek iritzi kontrajarriak dituzte enplegu-erregulazioko espedientearen negoziazio batzordeak 301 kaleratzeren inguruan zuzendaritzarekin akordioa lortzeari uko egin izanaz. ELAk eta LABek lantegiaren etorkizuna bermatuko duen proiektu industrial bat eskatzen jarraitzen dute. UGTk eta CCOOk salatu dute iritzi ezberdinek tentsioa sortu dutela ordezkari sindikal eta langileen artean.

Tubos Reunidosen auziak barne krisia sortu du ELA sindikatuan. Sindikatuaren iritziaren aurka, Trapagarango lantegiko ordezkariak "zuzendaritzaren planteamenduaren alde" agertu dira. Ondorioz, ELAk ostiral honetan argitaratutako ohar baten arabera, delegatu horiek "jada ez dute sindikatua ordezkatzen".

ELAren hitzetan, Tubos Reunidoseko lantegietan enplegua defendatzen jarraituko du. Sindikatuak "oso argi" utzi nahi izan duenez, horren etorkizuna "ez da kaleratzeetatik pasatzen, azken urteetako kudeaketa negargarria zuzenduko duen industria-proiektu batetik baizik".

Bestalde, LAB sindikatuak esan du "duintasuna, koherentzia eta klase borroka" izan direla nagusi afera honetan, "xantaiaren, mehatxuaren, beldurraren eta posibilismoaren aurrean".

Sindikatu horrek adierazi duenez, enpresa hasieratik saiatu da "bere ibilbide-orria inposatzen, alternatiba industrialei buruzko benetako eztabaidarik zabaldu gabe". Era berean, LABentzat "bereziki larriak" eta "arduragabeak" dira Mikel Jauregi Industria sailburuaren adierazpenak, ea Tubos Reunidosen inbertitzeko ausardia nork duen galdetu baitu.

LABek "batasunerako eta mobilizaziorako deia" egin du, eta igandetik aurrera deitu duten greba mugagabea babestu du. "Gatazkak bere horretan jarraitzen du, ez delako ezer konpondu eta enplegu-erregulazioko espedientea benetako mehatxua delako langileentzat eta etorkizun industrialarentzat".

CCOOk eta UGTk errespetu falta salatu dute

Comisiones Obreras sindikatuak deitoratu duenez, langile guztiek ezin izan dute erreferendumean bozkatu enplegu-erregulazioko espedientearen inguruko azken eskaintza, eta salatu du "batzuek interes handiz sortu duten giroa, mehatxu, irain eta funtsik gabeko deskalifikazioekin".

CCOOko iturrien arabera, Amurrion, Trapagaranen ez bezala, ezin izan da langile guztien azken eskaintza bozkatu, "beste sindikatu batzuen oposizioagatik". "Guk batzar nagusi horretatik aterako zena berretsi edo onartuko genukeen", erantsi dute.

Negoziatzeko aldia akordiorik gabe amaitu ostean, espedienteak eragingo dien langileen artean ziurgabetasuna da nagusi, CCOOren esanetan, "ez baitago argi zein baldintzatan aterako diren".

Azkenik, UGT Euskadi sindikatuak azpimarratu du bere ordezkariek "ahalegin itzela" egin dutela negoziazioetan, "jardueraren etorkizuna bermatzeko eta lanpostuak mantentzeko, plantillari azken hitza ematearen alde eginez".

Hori guztia "tentsio logikoa" izan duen testuinguru batean gertatu dela esan du sindikatuak, eta "errespetuaren eta desadostasunaren mugak gainditu dituzten egoerak" izan direla.

Hala ere, "testuingurua eta inguruabarrak kontuan hartuta" jardun duela adierazi du, "ordezkatzen dituen afiliatuen nahia eta gogoa ahalik eta ondoen islatuz, bai eta enplegua babesteko helburu nagusia ere".