Patronala absentismoa nola erabiltzen duen salatu dute sindikatuek laneko osasunaren eguneko mobilizazioetan

Laneko Segurtasunaren eta Osasunaren Nazioarteko Egunean, patronalak absentismo kontzeptua modu "interesatuan" darabilela salatu dute EAEko sindikatuek, Donostian eta Bilbon egin dituzten mobilizazio eta jardueretan.

LAB, ESK, STEILAS, EHNE-Etxalde eta HIRU sindikatuak elkarrekin mobilizatu dira Donostian, Absentismoa: gezurra ari du. Gure lan-eskubideak defenda ditzagun! lelopean. Sindikatuek “patronalak horrenbeste aipatzen duen absentismoa langileen prekarietatea baino ez dela” salatu dute, Gipuzkoako hiriburuan Eusko Jaurlaritzak duen egoitzan amaitu duten manifestazioan.

Nabarmendu dutenez, “ez dago absentismoari buruzko berririk gabeko egunik”, eta salatu dute patronalak kontzeptu horren “erabilera ez oso zorrotza” egiten duela, “iruzur orokortuaren ideia” zabaltzeko. Azaldu dutenez, kontzeptu horrek “borrokaren bidez lortutako eskubideak ere” barne biltzen ditu; hala nola kontziliozko neurriak edota aldi baterako LEEak.

Horrez gainera, 2025ean Euskal Herrian, lanean ari zirela hildako 84 langileak gogoan izan dituzte, baita “laneko gaixotasunen ondorioz hildakoen eta kalte fisiko eta mentalak jasaten dituztenen errealitatea” ere.

ELA sindikatuak ere absentismoaren kontzeptua “oker” erabiltzen dela salatu du Bilbon, 400 delegatu bildu dituen ekitaldi eta manifestazioan. Euskal Herrian absentismoa % 0 da. Kriminalizazioaren aurrean, prebentzioa lehen lerrora! leloarekin irten dira kalera.

Andoni Larralde lan osasuneko ordezkariak salatu du patronalak “absentismoaren aurkako gurutzada” baliatzen duela, kontrol eta zigor neurriak justifikatzeko. Haren esanetan, benetako arazoa “presentismoa” da: langile asko osatu gabe lanera joatera behartzea.

Gainera, kritikatu du mutuak eta enpresa pribatuak gero eta protagonismo handiagoa hartzen ari direla bajen kontrolean, eta horrek osasun sistema ezkutuan pribatizatzea dakarrela.

UGTk Bilboko Eliptika plazan elkartu ditu delegatuak, laneko ezbeharren aurrean, "zero tolerantzia" eskatzeko. Salatu du aurten gutxienez 13 pertsona hil direla EAEn lanean ari zirela.

Horrez gainera, sindikatuaren arduradun Tximi Lopezek mezua bidali dio patronalari, absentismoari egiten zaizkion aipamenen inguruan. Langileekiko “enpatia falta” eta laneko bajen arrazoien "analisi falta" kritikatu ditu.

“Absentismoaz hitz egiten horrenbeste tematzen den patronalari gogorarazi nahi diogu lanean bizia galtzen dutenak ez direla hurrengo egunean joaten, eta ez dutela nahita egiten. Gauza bera gertatzen da medikuaren aginduz bajan daudenekin”, esan du.

Azkenik, CCOO sindikatuak batzarra eta manifestazioa egin ditu Bilbon, ordaindu gabeko aparteko orduak “esplotazioa” direla salatzeko. Alfonso Ríos, lan osasunaren arduradunak, azaldu du iaz 270.000 aparteko ordu egin zirela astean EAEn eta horien erdiak ez zirela ordaindu.

Bere ustetan, patronalak absentismoari buruz darabilen diskurtsoa baliogabetzen du datu horrek: “hemen ez dago absentismorik”, esan du, eta gehitu du “langile klasearen esplotazio hutsa” egiten dutela “enpresa batzuk”.

CCOOk azpimarratu duenez, lanaldiak luzatzeak, erritmoak areagotzeak eta doako lana normalizatzeak nekea, estresa eta lan-arriskuekiko esposizio areagotzen ditu.