Satlantisek Lurra behatzeko bere bosgarren satelitea bidali du espaziora

Leioako (Bizkaia) Satlantis enpresak arrakasta handiz jarri du gaur orbitan Garai B-Innosat Unamuno izeneko satelitea. Bereizmen handiko irudien bidez, Lurra behatzea da helburua, eta nazioartean punta-puntan kokatzea. 

Vandenbergeko (Kalifornia, AEB) Espazio Gunetik jaurti dute, astearte honetan, Euskal Herrian 13:07ak zirenean. Lau kanal optiko osatzen dituzten bereizmen handiko bi kamera daramatza sateliteak —iSIM-90 eta iSIM-170 motakoak—, eta espazioan, gehienez, bederatzi urtez egon daiteke.

Bizkaiko enpresak espaziora bidaltzen duen bosgarren mikro satelitea da, 105 kilo inguru pisatzen ditu, eta SpaceX konpainiaren Transporter-16 ontzia erabili dute bidalketa egiteko. OHB Sweden Suediako enpresarekin elkarlanean garatu dute. 

Juan Tomas Hernani Satlantisen arduradunak azaldu duenez, "Lurra behatzeko bezeroek egindako eskari berriei" erantzutera dator misioa. Garai B satelitearekin "jauzi kualitatibo" handia emango dutela ziurtatu du, minutu bakarrean "400 kilometro behatzeko gaitasuna" izango duelako.