Adegik ezkortasun handia antzeman du Gipuzkoako enpresetan, batez ere industrian

Gipuzkoako enpresen artean ezkortasuna da nagusi, batez ere industrian, Adegik egindako azken Ekonomia Egoeraren Inkestaren arabera. Hala ere, Gipuzkoako patronalak % 2 eta % 2,5 arteko BPGaren hazkundea aurreikusten du 2026rako. Hazkunde hori, gainera, ia erabat zerbitzuek bultzatuko lukete.

Adegik, halaber, aurten soldatapeko 2.000 eta 2.500 lanpostu artean sortzea aurreikusten du, gehienak zerbitzuen sektorean.

Industria, egoera zailenean

Isabel Busto Adegiko presidenteak ostiral honetan azaldu duenez, enpresen % 23k uste dute beren merkatua atzeraldian dagoela, baina beste hainbeste susperraldia sumatzen ari da. Patronalaren iritzian, 2021etik izandako emaitzarik txarrenetako baten aurrean gaude.

Egoera bereziki zaila da industrian; izan ere, industria-enpresen % 31,5ek uste dute atzeraldian daudela, duela urtebete baino % 7,5 gehiago. Eraikuntzan eta zerbitzuetan, aldiz, % 10 ingurukoa da proportzio hori.

Eskaera-zorroak ere erakusten du egoeraren okerrera egin duela. Enpresen % 36k eta industria-enpresen % 45,5ek eskaera-maila ahula dutela adierazi dute. 2021eko urtarriletik izandako daturik txarrena da.

Bestalde, enpresen batez besteko fakturazioa % 2,2 hazi da aurreko hiruhilekoarekin alderatuta, baina hazkunde hori zerbitzuek bultzatu dute  gehien: % 4 hazi da zerbitzuen sektorean, eta % 1,2 soilik industrian.

Absentismoa eta kostuak, kezka nagusien artean

Enpleguari dagokionez, enpresen % 86,5ek plantilla mantendu edo handitzea aurreikusten dute, nahiz eta industriaren kasuan adierazle horrek 6 puntu egin duen behera iaztik. Gainera, industria-enpresen % 21,5ek uste dute gaur egun langile gehiegi dituztela.

Enpresen kezka nagusien artean daude lan-kostuak, soldata-igoerak eta absentismoa. Adegiren arabera, azken hori da apiriletik gehien handitu den kezka. Era berean, gora egin dute lehengaien eta energiaren kostuak eta hornidurarekin lotutako arazoek, baita langile kualifikatuak aurkitzeko zailtasunek ere.

Egoera horren aurrean, patronalak teknologian eta industriari aplikatutako adimen artifizialean gehiago inbertitzeko eskatu du, baita eraldaketa-proiektuetarako kapitala, enpresa txikiek tamaina irabazteko neurriak eta talentuaren aldeko apustu handiagoa ere.