Gizonezko batek bere bikotekidea hil du Valentzian

48 urteko emakume bat hil da gaur Paiportan (Valentzia), haren bikotekideak, 42 urteko gizonezkoak, hainbat labankada eman ondoren. Vicent Ibor udalerriko alkateak adierazi du jada atxilotu dutela hiltzailea.

Alkatearen hitzetan, 12:30 inguruan, emakumearen bizilagun baten deia jaso dute 112 larrialdi zerbitzuan, bikote bat eztabaidan ari zela jakinaraziz. Udaltzaingoa bertara iritsi denean, emakumea odolusten ari zen, eta segituan hil da.

Hildakoa Paiporta herriko bizilaguna zen. Udaltzaingoak oraindik ez daki lehenago hiltzailearen aurkako salaketarik jarri ote zuen.

Jatorriz Sierra Leonakoa den gizonezkoak hainbat labankada eman dizkio lepoan eta bularrean. Horietako batek karotida ebaki dio emakumeari; hori dela eta, azkar odolustu eta segituan hil da.

Alkateak azaldu duenez, bikotekidearen 12 urteko semeak krimena ikusi du, eta hildako emakumearen ahizparengana eraman dute.

Vincent Iborrek iragarri du udalbatzak ekitaldi bat antolatuko duela hildakoaren omenez, "gaitz hori behingoz amaitu dadin". Gaurko ezbeharrarekin, bost dira aurten Valentzian genero indarkeriagatik hil diren emakumeak.