Zazpi urteko mutil bat hil da igerileku batera erorita, Mañerun

Zazpi urteko mutiko bat hil da Mañerun, Nafarroan, etxe bateko igerileku partikularrera erori ostean. Atzo arratsaldean gertatu zen ezbeharra. DYAk jakitera eman duenez, hamar bat minutu egin zituen urpean umeak, senitartekoak ohartu ziren arte.

Uretan zegoela konturatu eta berehala atera zuten, baina ordurako oso larri zegoen umea. Larrialdi zerbitzuei abisua eman zieten 20:33 aldera,  eta bi anbulantzia bertaratu ziren.  Osasun zerbitzuko langileak ordu erdiz saiatu ziren tokian bertan haurra suspertzen, baina ez zuten lortu. Nafarroako ospitalera eraman zuten, eta han hil zen.