Sute batek 50 hektarea zereal eta basobera kiskali ditu Lantaronen

Sute bat izan da arratsaldean Lantaronen (Araba), eta 50 hektarea zereal eta basobera kiskali dira.

Alcedoko lursail batean zerealak batzen ari zen makina batek matxura izan du, eta horrek eragin du sutea, Segurtasun Sailak jakitera eman duenez.

Sutea 16:45 inguruan piztu da, eta Gasteizko eta Arabako Foru Aldundiko suhiltzaileak bertaratu dira. Ura botatzeko hegazkin baten laguntza ere behar izan dute.

21:15erako, sua kontrolpean zuten, baina suhiltzaileak bertan geratu dira, garrak erabat itzali arte.