Euskarari 'hegoak emateko' beharra nabarmendu dute eragile politikoek

Ekitaldi instituzionala egin dute Bilboko Guggenheim Museoan, Euskararen Nazioarteko Eguna dela eta, larunbat honetan. Bertan, euskal erakundeen eta eragileen ordezkaritza zabala izan da: EAEko erakundeak (Eusko Jaurlaritza, aldundiak eta udalak), alderdi politikoak, komunikabideak, gizarte eragileak, enpresak, sindikatuak, finantza-erakundeak, unibertsitateak, kirol taldeak...

Hizkuntza Politikaren alorraz arduratzen den Herri Aginteak Koordinatzeko Batzordeak (Hakoba) antolatu du ekitaldia, eta Bingen Zupiria  Kultura eta Hizkuntza Politika sailburuak egin ditu anfitrioi lanak. Hakobaren barruan daude Eusko Jaurlaritza, hiru aldundiak, EAEko hiru hiriburuak eta EUDEL eta UEMAk.

"Zer egin dezaket nik euskararen alde?" Horixe da 2016ko Euskararen Eguneko adierazpen bateratuak egindako galdera. Norberak hizkuntzaren alde asko egin dezakeela sinetsita, konpromiso pertsonalerako deia egin dute; ia 700 atxikimendu jaso ditu aldarriak, inoiz baino gehiago.

Aipatu adierazpena ekitaldian zehar proiektatu dute, eta azken hamarkadetan euskarak izan duen eboluzio positiboan du bere oinarria. Bertan jasotzen denez, Euskararen Eguna "indarra hartzeko eguna da"; izan ere, "oraindik urruti" baitago Euskadiko beste hizkuntza ofiziala den gaztelaniarekiko "gizarte parekotasunetik".

Horrenbestez, "gizarte" parekotasuna erdiestea ezarri dute helburutzat, eta euskara indartsu eta osasuntsu bizi dadila bere lurralde guztietan"

Euskara indartzeko konpromisoa

Adierazpena sinatu dutenek "euskara nahiz hizkuntza-elkarbizitza sendotzeko konpromisoa" hartu dute, "nork bere neurrikoa, nork bere ahalaren araberakoa". Konpromiso hori dela-eta sortu da "Zer egin dezaket nik euskararen alde?" leloa.

Galdera horri erantzun diote, besteak beste, Confebaskeko ordezkariak, Euskadiko CCOO eta UGT sindikatuetako idazkari nagusiak (Unai Sordo eta Raul Arza), Josu Urrutia Athleticeko presidentea eta EHU, Deusto eta Mondragon unibertsitateetako arduradunak.

Eusko Jaurlaritzako beste hainbat sailburu ere izan dira ekitaldian: Josu Erkoreka, Pedro Azpiazu, Jon Darpon, Cristina Uriarte, Arantxa Tapia eta Alfredo Retortillo sozialista. Unai Rementeria Bizkaiko ahaldun nagusia, Bakartxo Tejeria Eusko Legebiltzarreko presidentea eta Ana Otaduy Bizkaiko Batzar Nagusietako presidentea ere izan dira bertan.

Alderdi politikoetako ordezkariek ere hartu dute parte, eta bertan egon dira Itxaso Atutxa (PNV), Maddalen Iriarte (EH Bildu), Nagua Alba (Podemos), Jon Azkue (PSE-EE), Laura Garrido (PP) eta Isabel Salud (Ezker Anitza-IU).

Ekitaldi instituzional bateratu horrekin batera, beste hainbat ospakizun-jarduera egin dira Euskararen Egunean, horren lekuko zanik Gasteizko Udalak gaur egindakoa (Bilbo eta Donostiako udalek ostiralez egin zituzten bereak).

Horrez gain, euskarak badu gaur beste hitzordu garrantzitsu bat Durangoko Azokaren bigarren egunarekin.

Jaurlaritzak "adostasun handiagoa" bilatuko du

"Euskararen Nazioarteko Egun honek ospakizun kutsua izatea nahiko nuke, zer ospatu asko daukagulako. Euskara bizirik ikusi eta entzutea ospatzekoa da", esan du Bingen Zupiriak Kultura sailburuak bere mintzaldian. Transmisio bide berriak aurkitu direla ikustea ospatzekoa dela nabarmendu du, eta euskal hizkuntza sistemak erronka horretan izan duen eragina ezinbestekoa izan dela gaineratu du, baita euskaltegiena ere.

Hobetu beharreko gauzak baldin badaude ere, orokorrean, Zupiria pozik azaldu da. Halaber, hizkuntza politikaren inguruan, herri erakundeen aho bateko babesa jasotzeko asmoz, hizkuntza politika eraginkorragoa egingo dutela ziurtatu du. "Euskara gero eta biziagoa eta gero eta erabilgarriagoa izan dadin, euskararen "agenda estrategiko berria" adosteko konpromisoa hartu dute. "Nafarroako Gobernuarekin eta Iparraldearekin egiten ari garen lana sendotu" egingo dutela gaineratu du.

"Zorionak euskarak aurrera egin dezan hizkuntza aniztasunari euskararen oparia egiten diozuen hiztun guztioi, bihotzetik ezpainera eramaten duzuen guztioi", esanez amaitu du hitzaldia Zupiriak.