Pertsona bat zauritu da N-1ean, Beasainen, bi autok talka eginda

Bi autoren arteko istripua izan da goizean N-1 errepidean, Beasainen, Gasteizko noranzkoan, Eusko Jaurlaritzako Segurtasun Sailak eitb.eus-i jakinarazi dionez. Pertsona bat zauritu da.

Ezbeharra 09:15 aldera jazo da. Ikertzen ari diren arrazoiak tarteko, bi autok talka egin dute eta horietako bat iraulita geratu da. Gidaria barruan harrapatuta geratu da, eta suhiltzaileek atera behar izan dute. Zumarragako Ospitalera eraman dute, zaurituta.

Hasiera batean, errepidea itxi behar izan dute Gasteizko noranzkoan. 09:45 aldera, errei bat ireki dute, baina ilarak sortu dira. 11:00etarako erabat garbitu dute bidea, eta zirkulazioa bere onera etorri da.