Sute bat izan da Trapagaranen eta hiru pertsona ospitalera eraman behar izan dituzte

Sute bat izan da Trapagarango (Bizkaia) Bizkaia kaleko etxebizitza batean, arratsaldean. 46 urteko emakume bat eta haren bi seme-alabak, 26 urteko neska bat eta 17 urteko adingabe bat, Gurutzetako ospitalera eraman behar izan dituzte. Neskak erredura arinak ditu hanka batean. Amak eta anaiak kea arnastu dute, Udaleko iturriek jakitera eman dutenez.

15:30 aldera zartagin batek su hartu du eta sugarrak etxebizitzako sukaldearen ke-kanpaitik zabaldu dira.

Alabak zartagina sutik kendu du eta hankan erre da. Udaltzaingoa eta suhiltzaileak bertaratu dira. Suhiltzaileek sua itzali dute.