800 pertsona inguru bildu dira Donostian, haur-minbiziaren aurkako martxa batean

800 bat lagunek parte hartu dute igande honetan Donostian Aspanogi minbizidun umeen gurasoen Gipuzkoako elkarteak antolatutako ibilbide nordikoan. Parte-hartzaile bakoitzak 10 euro ordaindu ditu, eta ospitaletan minbiziari aurre egiten ari diren umeei eta euren familiei baliabideak eskaintzeko izango da diru-bilketa.

Gaixotasuna pairatu duten haur eta familia anitz bildu dira; beste batzuk, ordea, neska-mutilei indarra emateko etorri dira. Guztiek sei kilometroko ibilbidea egin dute, Donostiako hiru hondartzak zeharkatuz, eta bi funtsezko mezu zabaldu dituzte: batetik, itxaropena, eta, bestetik, gaitza gainditu duten umeek oraindik medikuen jarraipena behar dutela.

Astero haur minbiziaren kasu bat atzematen da Euskadin, gehienak, leuzemiarenak. Dena dela, biziraupena altua da, % 80koa.