Kontrolpean hartu dute Getzeko txatartegi batean piztu den sutea

Nafarroako suhiltzaileek kontrolpean hartu dute igande arratsaldean Getzeko txatartegi batean (Galar zendea) piztu den sutea, Foru Gobernuak jakitera eman duenez. Beriainera iritsi da kea, eta Foruzaingoak leihoak ixteko aholkatu die bizilagunei, etxeetan sar ez dadin.

Suhiltzaileak lanean jarraitzen dute igande gauean, eta pertsona bat Nafarroako Ospitalera eraman behar izan dute, kea arnasteagatik.

18:30 aldera piztu da sua, eta, inguruan sortutako kearen ondorioz, Beriaingo igerilekuan zeuden herritarrak irtenarazi dituzte, prebentzio neurri moduan.

Foruzaingoak, gainera, gune irekietatik aldentzeko eta etxeetan leihoak itxita itxaroteko aholkatu die herritarrei, kea barrura sar ez dadin.

Foru Gobernutik azaldu dutenez, prebentzio moduan erabaki dute Beriaingo igerilekua ixtea, izan ere, haizeak inguru horretara eraman du kea. Alabaina, beste edozein suteko kea bezain toxikoa dela azpimarratu du.

Gainera, haizeak berak kea eremu bakar batean pilatzea galarazi du, eta, ondorioz, herritarrek izan duten arriskua "minimoa" izan da.

Bestalde, SOS Nafarroak Cordovillako suhiltzaileak eta helikoptero bat mobilizatu ditu sua itzaltzeko lanetan laguntzeko.

¿ Atención!!! Incendio en chatarrería en Salinas de Pamplona. El viento traslada el humo hacia el municipio de Beriáin. Recomendamos cerrar ventanas, permanecer en el interior de locales o viviendas y abandonar zonas abiertas.

— Policía Foral-Foruzaingoa (@policiaforal_na) August 4, 2019