Supermerkatuetako langileekiko "gorroto jarrerak" salatu ditu Uvescok

Supermerkatuetako langileek jasotzen ari diren "gorroto eta ulertezintasun jarrerak" salatu ditu Uvesco talde gipuzkoarrak, BM eta SuperAmara supermerkatuetako jabeak. "Arbuizko" mezuak jaso beharrean, "esker onekoak" jaso beharko lituzteketela adierazi du.

Uvescok azken egunetan profesional horiei zuzendutako mezuak aipatu ditu ohar batean. Oharrean, idazki horietako bat eransten du, supermerkatuetan lan egiten duten Iruñeko hiru auzokideri zuzendutako anonimoa, hain zuzen, zeinak eremu komunak "ahalik eta gutxien" erabiltzea edo "pandemiak irauten duen bitartean" beste etxebizitza bat bilatzea iradokitzen duen.

"Arrisku foku garrantzitsua zarete, eta gure familiak zaindu behar ditugu. Ez dugu arriskurik nahi. Eskerrik asko", adierazi du oharraren idazle anonimoak.

Mezu horiek "puntualak baina barkaezinak" direla nabarmendu du supermerkatuen taldeak, eta halakorik ez dutela onartuko adierazi du, "ezta adierazpenik txikienean ere, min handia egiten baitiote erabat eredugarria eta ingurunearekin zein gizartearekin, oro har, konprometitua dagoen jendeari".

"Langileak aparteko eta funtsezko lana egiten ari dira, hain zuzen ere, etxean gera daitezkeenek konfinamendua ahalik eta hornikuntza-baldintza onenetan igaro dezaten. Esker oneko mezuak jaso beharko lituzkete, eta ez arbuiozkoak. 20:00etako txaloak ere haientzat dira", azpimarratu du.

Uvescoko 5.100 langilek prebentzioaren eta higienearen inguruko prestakuntza jaso dute krisi honi aurre egiteko. Halaber, "lanpostuetan neurriak hartu izan dira, eta, zalantzarik gabe, haien etxebizitzetan ere segurtasun neurriak aplikatzen dituzte; beraz, "akusazioek ez dute inolako oinarririk".

Uvescoko iturriek adierazi dutenez, ez dute antzeko kasurik "atzeman" Euskadin, "baina horrek ez du esan nahi egon ez direnik".