Kalean edateko bilkura batean zeuden 38 pertsona salatu ditu Ertzaintzak Astigarragan

Ertzaintzak 38 salaketa jarri ditu Astigarragan, gaur egun indarrean dauden osasun neurriak ez betetzeagatik. Izan ere, Sagardoaren Museoaren kanpoaldean, kalean edateko bilkura batean parte hartu zuten hainbat gaztek asteburuan.

Igande goizaldean Ertzaintzak jasotako dei batek ohartarazi zituen agenteak Sagardoaren Museotik gertu gertatzen ari zenaz. Han berrogei bat gazte zeuden, kalean edaten.

Pandemia kontrolpean izateko helburuarekin jarritako neurri bereziak ez betetzeak, kale-zurrutean aritzeak adibidez, arriskua ekar liezaioke osasun publikoari. Horregatik, kalean botilioia egin zuten gazteak identifikatu eta guztira 38 salaketa jarri zituen Ertzaintzak.