Lehendik gaixorik zegoen adingabe bat hil da COVID-19arekin EAEn

9 urtetik beherako adingabe bat hil da EAEn COVID-19arekin, Eusko Jaurlaritzak ostegun honetan zabaldutako datuen arabera. Adingabeak patologiak zituen aurretik.

Azken 24 orduotan, koronabirus bidezko kutsatzeen % 28 20 urtetik beherakoen artean gertatu dira, batez ere 17 eta 18 urte bitartekoen artean, baina Eusko Jaurlaritzak ez dio eskola-jarduerari egozten.

Osasun Saileko eta Osakidetzako Zaintza eta Kontrol Programaren koordinatzaileak, Ignacio Garitanok, EAEko egoera epidemiologikoa aztertu du. Gaur 518 kutsatze jakinarazi dira, baina positiboen tasak % 5etik behera jarraitzen du, zehazki, % 4,7an.

Milatik gora kutsatu berrietatik, 145 zero eta hemeretzi urte bitarteko haur eta gazteei dagozkie; 10 eta 19 urte bitarteko nerabeei dagozkie 110; 40 eta 49 urte bitartekoen artean 86 kutsatze izan dira; eta 34 izan dira 0tik 9 urtera arteko haurren artean.

Garitanok azaldu duenez, pandemiak eskola eremuan eta eskolatzeko adinean dauden gazteen artean izan duen bilakaera arretaz aztertzen ari da Jaurlaritza, eta aitortu du "zaila" dela non kutsatu ahal izan diren zehaztea.

Hala eta guztiz ere, esan du "oso litekeena" dela kutsatze horiek eskola-eremuan gertatu ez izana, kontuan hartuta adin-tarte horretako gazte zaharrenak (17-18 urte) gainerako ikasleak baino beranduago sartu zirela eskoletan, eta aurrez aurreko eskolak horien artean ez direla nagusi.

Eskoletan, Garitanok jakinarazi du azken astean 3 eta 16 urte bitarteko 188 haur eta gaztek positibo eman dutela eta, ondorioz, 2.000 pertsona inguru (zuzeneko kontaktuak) isolatu dituztela EAEn, hau da, 10,7 pertsona ikasle bakoitzeko.

Ostegun honetan argitaratu den asteroko txosten epidemiologikoan jasotako datuen arabera, pandemia egonkortu egin da EAEn; izan ere, azken 14 egunetan 100.000 biztanleko intzidentzia-tasa 320,6 izan zen igandean, eta abuztuaren 22an 319,4koa zen.

Irailaren 14tik 20ra bitartean, EAEn PCR bidez baieztatutako 3.245 kasu positibo atzeman zituzten; horietatik 1.492 Bizkaian kutsatu ziren, 1.118 Gipuzkoan, eta 483 Araban. Beste 152 ohiko bizilekua autonomia-erkidegotik kanpo duten pertsonak ziren.

Aste honetan 322 senda agiri eman zituzten ospitalean; 85 pertsona hil ziren, baina 62 izan ziren COVID-19ak zuzenean eragindako heriotzak.

Datu horiekin, EAEn 1.898 pertsona hil dira koronabirusarekin izurritea hasi zenetik, hau da,% 3,8ko hilkortasun-indizea izan du gaitzak.

Ospitaleetako egoera "ona" dela nabarmendu du Garitanok, ospitaleratutakoen % 32 baino ez baitira COVID-19aren ondorio.