Hildakoen kopuruak behera egin du EAEn, eta kutsatze tasak gora egin du Nafarroan

Euskal Autonomia Erkidegoak 410 kutsatu berri zenbatu ditu azken 24 orduetan COVID-19aren ondorioz, eta Nafarroako Foru Erkidegoan 378 positibo berri erregistratu dituzte egindako PCR probetan.

Euskadik 34 hildako zenbatu ditu azken astean eta 410 kutsatu berri (119 gutxiago) atzeman ditu astearte honetan. Gainera, azken 24 orduetan 33 pertsona ospitaleratu dituzte eta 50 gaixo zainketa intentsiboetako unitateetan daude.

Osasun Sailak jakitera eman duenez, atzo, asteartea, 7.466 PCR proba egin zituzten eta horietako 410ek eman zuten positibo (% 5,5). Beraz, behera egin du kutsatze-tasak, aurreko egunean % 7,8ra iritsi ostean.

Datuak lurraldez lurralde aztertuta, kutsatze guztietatik 39 Araban atzeman dituzte, aurreko egunean atzemandako 49ak baino gutxiago, eta horietatik 29 Gasteizen.

Bizkaian ere, behera egin du kutsatzeen kopuruak, 179ra, astelehenean 255 izan baitziren. Bilbon 34 positibo berri zenbatu dituzte, Barakaldon 25, Getxon 15 eta Sestaon 12.

Gipuzkoan, 186 kutsatu atzeman zituzten atzo, eta 224 izan ziren bezperan. Donostian 24 kutsatze berri atzeman dituzte, Azpeitian 15, Irunen 13 eta Andoainen, Ordizian eta Zaldibian 11na.

Halaber, EAEtik kanpo bizi diren sei pertsonak eman dute positibo EAEn egindako probetan, aurreko eguneko berberak.

EAEn, 33 pertsona ospitaleratu dituzte, aurreko egunean baino 16 gehiago. Hala ere, 50 gaixo daude zainketa intentsiboetako unitateetan, astelehenean baino bi gutxiago. Guztira, 313 gaixo daude COVID-19arekin EAEko ospitaleetan, bezperan baino bat gehiago.

BIDEOA: "PCR probak populazio osoari derrigorrez egitearen aldekoa naiz" 

CONTENIDO NO ENCONTRADO

Adinaren arabera, Euskadin kasu berrietatik 156, 40 eta 64 urte artekoak dira, eta 90, 19 eta 39 urte artekoak. 18 urtetik beherako herritarren artean 83 kutsatu zenbatu dituzte, 65 eta 79 urte bitartekoen tartean 44 kasu eta 80tik aurrerakoen artean 23 positibo.

100.000 biztanleko 14 eguneko intzidentzia-tasa metatu handiena 19 eta 39 urte bitarteko biztanleei dagokie, 327,5eko tasarekin; txikiena, berriz, 65 eta 79 urte bitarteko biztanleei dagokie, 165,2ko tasarekin.

Oinarrizko ugalketa-kopurua, kasu positibo bakoitzak zenbat pertsona kutsatzen dituen neurtzen duena, 1,15ekoa izan da azken orduetan Euskadi osoan.

Euskadiko intzidentzia epidemiologikoari buruzko bilakaera hemen kontsulta daiteke. Azken orduetan herriz herri zenbatutako positibo berriak azter daitezke, eta pandemia hasieratik atzemandako kasu guztiak eta adin taldeen araberako datuak ageri dira bertan.

Bestalde, 130 ikasgela itxi dituzte asteazken honetan Euskadin, COVID-19aren kasu positiboren bat izateagatik, hau da, asteartean baino 20 gehiago (ikasturte honetan dauden ikasgelen % 0,74).

Beste hiru positibo Gipuzkoako eta Arabako erresidentziatan

Donostiako Alai Etxe eta Berra egoitzetako hiru erabiltzailek positibo eman dute azken orduetan. Zorionez, ez da hildakorik izan eta dagoeneko 56 adineko sendatu dira.

Horrela, bada, ondoko erresidentziatan daude adinekoak koronabirusarekin kutsatuta: Hernaniko Santa Maria Magdalenan, 8; Errenteriako Jesusen Bihotzean, bi; Donostiako Alai Etxen, 25; Bergarako Mizpirualden, 13; eta Donostiako La Paz eta Berra egoitzetan, bana.

Beraz, guztira 50 adineko daude COVID-19arekin gaixorik Gipuzkoan. Bigarren olatua hasi zenetik, 56 adineko sendatu eta 33 hil dira.

Horrez gain, zortzi adineko ospitalean daude, eta beste 39 Eibarko Ospitaleko solairu sozialean artatzen ari dira.

Bestalde, Arabako erresidentziatan 29 adineko sendatu dira azken egunetan eta, ondorioz, gaitza gainditu dutenak 123 dira jada.

Azken orduetan, baina, beste positibo bat detektatu dute Dulantziko Mikelats etxebizitza komunitario pribatuan.

Bizkaiko Foru Aldundiak ez du lurralde horretako zentroetako egoerari buruzko daturik eman asteazken honetan.

Nafarroak 376 kasu berri zenbatu ditu

Foru Erkidegoak 376 kasu berri zenbatu ditu asteartean, 3.013 PCR proba egin ostean. Gainera, beste bi heriotza (91 urteko gizon bat eta 96 urteko emakume bat) izan direla jakinarazi du Nafarroako Osasun Publikoaren eta Lan Osasunaren Institutuak.

Nafarroako osasun-sare integratuak, ospitaleratzeen eta alten balantzea egin ondoren, 282 paziente hartzen ditu ospitaleetan eta modalitate ezberdinetan. Zainketa intentsiboetako unitateetan, berriz, 31 pertsona daude ospitaleratuta.

Santos Indurain Foru Gobernuko Osasun kontseilariak aitortu duenez, datuak "handiak, txarrak eta kezkagarriak dira, ez dugu ezkutatzen". Bezperan 362 kasu erregistratu zituzten, eta aurreko egunetan 400 baino gehiago (egun batean, 546 ere atzeman zituzten).

Ikuspegi geografikotik, Iruñea eta Eskualdean izan ziren positiboen % 59, Tuterako Eremuan % 25 eta Lizarrako Eremuan % 5. Gainerako positiboak (% 11) Nafarroako beste zonalde batzuetan banatzen dira.

Adin-tarteei dagokienez, atzo 45 eta 59 urte bitartekoen taldea izan zen nagusi (% 25), eta ondoren 30 eta 44 urte bitartekoen taldea (% 22); ondoren, 15 eta 29 urte bitartekoen taldea (% 21), 15 urtetik beherakoen taldea (% 15) eta 60 eta 75 urte bitartekoen taldea (% 12). Azkenik, 75 urtetik gorakoen taldea % 5ekoa da. Kasu berrien batez besteko adina 40 urtekoa da.

Generoari dagokionez, intzidentzia zati berdinetan banatzen da gizonen eta emakumeen artean, talde bakoitzean % 50.

Gobernu bileraren osteko prentsaurrekoan, Santos Indurainek jakinarazi du Zarrakaztelun eta Cadreitan konfinamendu perimetral bat onartzea erabaki dutela, kasu asko izan direlako. Konfinamendua ostegunetik ostiralerako gauerdian hasiko da eta zazpi egunez luzatuko da. Zarrakazteluk 4.289 kasuko intzidentzia metatua du 100.000 biztanleko azken 14 egunetan, eta Cadreitak, 4.328 kasukoa.

Indurainen esanetan, aurreko astean baino % 45 kasu gehiago izan dira Nafarroan, "300 kasu baino gutxiago, % 20ko murrizketaren ostean". "Hau historia da, kopuru hori gainditu dugu berriro", esan du.

Kasu berrien % 65 sintomatikoak izan ziren eta % 67 baieztatutako beste kasu batzuetako kontaktuak. Kasuen % 38tan transmisioa etxean gertatu zen, eta beste kasu asko familiaren eta lagunen bileren testuinguruan gertatu ziren; horrek esan nahi du kasu asko "konfiantzazko" inguruneetan gertatzen direla. Lan- eta eskola-eremua kutsatzeen % 7,5ekin lotu zen.

Birusak eragindako infekzioen intzidentzia metatuari dagokionez, atzoko kasuak batuz gero, 23.012 pertsona kutsatu dira eta guztira 626 dira hildakoak.

Kontseilariak adierazi duenez, "orduan aipatu dugun goi-ordoki hori hautsi egin zen eta egunez eguneko kasuen hazkunde kezkagarria hasi zen, zerra hortzen fenomeno tipikoa baino zerbait gehiago da".

Haur eta Lehen Hezkuntzako 314 ikasle nafar konfinatu dituzte azken 24 orduetan. Foru Erkidegoko 14 ikastetxetako bizikidetza-talde egonkorretakoak dira. Aldi berean, beste 244 ikasle itzuli dira ikastetxeetara, klaseak aurrez aurre hartzera. 

Espainiak 11.970 kasu berri eta 209 heriotza gehiago erregistratu ditu

Espainiako Osasun Ministerioak 11.970 COVID-19 kasu jakinarazi ditu asteazken honetan, eta horietatik 5.104 diagnostikatu dituzte azken 24 orduetan; asteartean, berriz, 2.759 izan ziren, eta, guztira, 908.056 pertsona kutsatu dira.

COVID-19aren ondorioz hildakoei dagokienez, Salvador Illak zuzentzen duen Departamentuak 209 hildako gehiago erregistratu ditu asteazken honetan, 486 gehiago azken astean. Guztira, 33.413 pertsona hil dira koronabirusaren ondorioz Espainian.

Gaur egun, 11.671 paziente daude ospitaleratuta Espainia osoan, eta 1.652 zainketa intentsiboetako unitateetan; azken 24 orduetan 1.422 ospitaleratze eta 1.405 alta izan dira. Koronabirusak okupatutako oheen okupazio-tasa % 9,84koa da dagoeneko, eta zainketa intentsiboetako unitatateetan % 18,76koa.