Emakume bat atxilotu dute Beasainen, bikotekidea bizkarrean sastatzeagatik

52 urteko emakume bat atxilotu zuen Ertzaintzak ostiralean, Beasainen (Gipuzkoa), bikotekidea bizkarrean labanaz sastatzea egotzita. Gizona Zumarragako Ospitalean dago.

Segurtasun Sailak jakitera eman duenez, gertakariak bart jazo ziren, 22:30 aldera. Beasaingo etxebizitza batean gertatutako eraso baten berri izan zuen Ertzaintzak.

Gizona lehen solairuan ahuspez etzanda aurkitu zuten ertzainek, bizkarrean zauri bat odoletan zuela. Bizilagun bat zauritua artatzen ari zen.

Bikotekidearekin eztabaida beroa izan zuela azaldu zien zaurituak ertzainei, eta etxebizitzatik alde egiteko erabakia hartu zuela.

Hala ere, etxetik ateratzen ari zela sorbaldaren behealdean min-ziztada sentitu zuen, eta emakumeak labana sartu ziola konturatu zen.

Jarraian, gizonezkoa lehen solairura jaitsi zen, bizilagun bati laguntza eskatzeko.

Gutxi geroago, osasun langileak heldu ziren, eta biktima artatu eta Zumarragako Ospitalera eraman zuten.

Aldi berean, beste ertzain batzuk etxebizitzara igo ziren, eta ustezko erasotzailearekin hitz egin ondoren, etxeko indarkeria egotzita atxilotu zuten.

Atxilotua epailearen esku utzi dute goizean.