Urtebete geroago, bada covid-19ari lotutako albiste onik

2020ko martxoan, pandemia hasi eta gutxira, Ignacio Lopez-Goñi Nafarroako Unibertsitateko Mikrobiologia katedradunak covid-19ari lotutako hamar albiste positibo bildu zituen artikulu batean.

Orain, urtebete geroago, gauza bera egin du, The Conversation zientziari buruzko aldizkarian argitaratutako artikulu batean. Eta birusak mundu osoan zabalduta jarraitzen duen arren eta bere aldaera berriek datozen hilabeteetan izango duten eragina nolakoa izango den jakiterik ez badago ere, komunitate zientifikoak lortutako aurrerapenak nabarmendu ditu Lopez-Goñik.

Hauek dira, bere ustez, baikorrak izateko hamar berririk garrantzitsuenak:

1. Malariari buruz baino artikulu gehiago daude SARS-CoV-2 eta covid-19ari buruz

Birus berriari eta gaixotasunari buruz 100.000 artikulu baino gehiago daude; duela urtebete 164 inguru ziren. Gaur egun, komunitate zientifikoak gehiago daki SARS-CoV-2ri eta covid-19ari buruz,  urte luzeetan ikertzen ari diren beste gaixotasun batzuei buruz baino.

2. 200 txerto berri baino gehiago

Duela urtebete covid-19aren aurkako txertoak sortzeko zortzi proiektu zeuden. BioRENDER atariaren arabera, orain 195 hautagai gehiago daude, eta 71rekin proba klinikoak egiten ari dira.

3. ARNm txertoak oso seguruak dira

Covid-19 kasuak, gaixotasunaren ondorioak eta heriotza kopuruak alderatuz gero, txertoak seguruak direla eta ondorio larriak arintzen dituztela egiaztatu da.

4. Txertoak eraginkorrak dira

Atariko datuek erakusten dute txertaketa eraginkorra izaten ari dela. Infekzioen kopurua nabarmen jaisten ari da, batez ere 60 urtetik gorako pertsonen artean. Adin-talde horretan,% 56 infekzio gutxiago izan dira, ospitaleratzeak %42 murriztu dira, eta heriotza-tasa % 35 jaitsi da, bigarren dosiaren ondoren.

5. Txertoekiko konfiantza handitu egiten da

Oraingoz, 160 milioi dosi baino gehiago eman dira eta txertaketak aurrera egin ahala, herritarrek txertoekiko duten konfiantza handitzen ari da, 2020ko azarotik 2021eko urtarrilera bitartean Europan, Asian eta Australian egindako inkesta baten arabera.

6. Birusaren aurkako immunitateak gutxienez zortzi hilabeteko iraupena dauka

Gizabanako bakoitzaren arabera ezberdintasunak egon daitezkeen arren,  kasu gehienetan immunitatea sei eta zortzi hilabete artekoa da, infekzioa garatu den unetik hasita.

7. Kasu larrienen aurreko tratamendu berriak

Egun, badakigu covid-19a pneumonia bat baino askoz gehiago dela. Komunitate zientifikoak askoz gehiago ezagutzen du gaixotasuna, eta oraingoz birusa inhibitzen duen antibiral espezifikorik ez badago ere, badira pronostikoa asko hobetzen duten eta kasu larrienetan heriotza-tasa murrizten duten tratamendu-konbinazioak. Une honetan 400 proba kliniko baino gehiago daude abian.

8. Ez dago griperik

Kezka handia zegoen covid-19ak neguko hilabeteetan izango zuen eraginaz, garai horretan beste hainbat birus hedatzen direlako, tartean gripea. Alabaina, pandemiari aurre egiteko hartu diren neurrien ondorioz, gripea eta arnas aparatuarekin lotutako beste birus batzuk desagertu egin dira.

9. Birusaren bilakaera denbora errealean jarrai dezakegu

SARS-CoV-2ren aldaera genetiko berriek txertaketan eta pandemian izan dezaketen eragina ez dago argi. Edonola ere, egun, komunitate zientifikoak birusaren bilakaera eta aldaera genetiko berrien agerpena denbora errealean jarraitzeko gaitasuna dauka. SARS-CoV-2 genomaren 260 000 sekuentzia baino gehiago daude eskuragarri datu-baseetan.

10. Pandemiak behera egin du munduan

Komunitate zientifikoak ez daki nolakoa izango den balizko laugarren olatua, ezta agertzen ari diren aldaera genetiko berriek izan dezaketen eragina ere, baina berri ona da pandemiaren bilakaera beheraka egiten ari dela munduan.