Gizon bat atxilotu dute Tuteran, Valladoliden emakume bat hiltzea egotzita

Polizia Nazionalak 45 urteko gizonezko bat atxilotu du Tuteran (Nafarroa), 41 urteko emakume baten ustezko hiltzailea delakoan; haren gorpua indarkeria zantzuekin aurkitu zuten Valladolideko pentsio batean otsailean. Atxilotuaren egungo bikotekidea ere atxilotu dute.

Javier Izquierdo Espainiako Gobernuak Gaztela eta Leonen duen ordezkariaren arabera, heriotzaren zergatia ezagutzeko auzitegiko medikuen ebaluazioaren zain daude, eta horren ostean, Genero Indarkeriaren Ordezkaritzak erabakiko du krimenak indarkeria matxistarekin zerikusia izan zuen ala ez. Antza denez, atxilotua hildakoaren bikotekidea zen garai hartan.

Emakumearen gorpua 2021eko otsailaren 21ean aurkitu zuten, pentsioko gela batean. Emakumeak urtarrilaren 28an hartu zuen ostatu gizon batekin, polizia iturrien arabera. Establezimenduko jabeak, bi lagunak zenbait egunez ikusi ez zituelako ohartarazita, otsailaren 21ean atea jo zuen eta, erantzunik jaso ez zuenez, logelan sartu zen. Bertan, 41 urteko emakumea hilik aurkitu zuen ohean.

Poliziak, gertaeren lekuaren lehen ikuskapen batean, indarkeriazko heriotza posible baten zantzuak ikusi zituen; besteak beste, eszenaren osaera, aztarna biologikoen aurkikuntza, eta gela berean zegoen gizonak arinegi ihes egin zuela, inolako azalpenik gabe.

Valladolideko Emakumeen aurkako Indarkeriaren arloko 1. Epaitegiak zantzu berriak aurkitu zituen bere ikerketan, besteak beste, azkenean atxilotutako gizonak ihes egin zuela, eta hilketa hipotesia indarra hartu zuen. Ustezko egileak otsailaren 4ko goizaldean alde egin zuen Valladolidetik, eta emakumearen gorpua pentsioko logelaren barruan geratu zen, 17 egun geroago aurkitu zuten arte.

Atxilotuak bidaia bat hasi zuen hainbat herritatik igaroz. Azkenik, Tuteran atxilotu zuten apirilaren 22an, eta bi egun geroago espetxeratu zuten. Haren bikotekide berria, ustez estalketa-delitu bat egin izana egozten diotenari, karguekin aske dago.