Arabako bi mendate itxi dituzte, elurragatik

Neguko Bidezaintza Plana fase operatiboan aktibatuta, elurra 700 metrotik behera egin dezakeela kontuan izanik, Arabako bi mendate itxi dituzte, elurragatik, eta kateak behar dira hainbat puntutan, lurralde historiko horretan.

Hala, Herrera eta Opakua itxi dituzte, elurragatik.

Urduñako mendatean, berriz, ibilgailu guztiek kateak behar dituzte.  

Bestalde, A-1 eta N-622 errepideetan arretaz gidatzeko eskatzen du Eusko Jaurlaritzako Segurtasun Sailak.

Gogoratu behar da A-15 errepidearen Gipuzkoako zatia moztu egin daitekeela elurra egiten hasten badu, Gipuzkoako Foru Aldundiaren Neguko Bidezaintza Planak jasotzen duen bezala. Hala gertatzen bada, ibilgailu astunek N-I errepidea edo Sakanako autobia (A-10) erabili beharko dute, eta arinek Berastegitik Tolosara doan GI-2130 errepidea erabili ahalko dute. Nolanahi ere, komeni da errepideen egoera kontsultatzea inora joan aurretik. 

Nafarroan, Foru Erkidegoko errepide sare osoan kontuz gidatzeko gomendatu du Gobernuak, 500-600 metrotik gora elurra egin dezakeelako. Prezipitazioak gogorrak eta iraunkorrak izan daitezke Foru Erkidegoko ipar partean bereziki.

Gainera, Frantziarako igarobideak itxita daude, bai Izabatik, bai Otsagabitik, elurra dagoelako galtzadan.