Zanbranak eta Kanpezuk tenperaturaren marka historikoa hautsi dute: 41,7 eta 41,6 gradu, hurrenez hurren

Zanbranako eta Kanpezuko estazio meteorologikoek 41,7 eta 41,6 graduko tenperaturak erregistratu zituzten atzo, hurrenez hurren; bi kasuetan serie historikoaren maximo absolutua izan da. Kanpezun, aurreko erregistrorik handiena 2021ean zenbatutako izan zen, 41,4 gradurekin, eta 2019an Zanbranan, 41,3 gradurekin.

Euskalmetek jakinarazi duenez, Trebiñuko (40,9 ° C, 2012an 40,4 ° C), eta Espejoko (41,2 ° C, 2012an 41 ° C)  estazioetan ere markak hautsi ziren.

Baso-suteak izateko arriskua

Euskal Herri osoa astintzen ari den bero-bolada honetan, baso-suteak izateko arriskua areagotuko da gaur eta bihar, beroari hego-haizea batuta, Euskalmet Euskal Meteorologia Agentziak zabaldutako informazioaren arabera. Gauzak horrela, baso-sute arriskua muturrekoa edo oso altua da iragate-eremuetan, Ebro ondoko eskualdean eta Kantauri barnealdean tenperatura altuengatik eta hegoaldeko haizeagatik.

Tenperatura altuei dagokienez, igande honetan Arabak alarma gorrian jarraitzen du, eta Bizkaia eta Gipuzkoa alerta laranjan daude, eta joera berdinari eutsiko diote astelehen honetan. Gainera, bihar arratsaldean galerna sartuko da eta, horren ondorioz, 70 km/h baino gehiagoko haize-ufadak espero dira eta tenperaturak 15 gradu  jaitsiko dira ordubetean. Hori dela eta, 15:00etatik 19:00etara abisu horia ezarriko dute itsas-arriskuagatik.

Nafarroak ere bero-boladarekin lotutako hainbat alerta meteorologiko aktibatuta ditu igande honetarako, astelehenerako eta astearterako. Zehazki, igandean, uztailaren 17an, Erribera alarma gorrian egongo da 42 gradurainoko tenperatura maximoengatik, eta gainerako Foru Erkidegoa alerta laranjan, termometroa 38 eta 41 gradu arteko maximoetara iritsiko dela aurreikusten baita; gainera, ia Nafarroa osoa muturreko arriskuan dago, maila gorrian, baso-suteak izan daitezkeelako.

Bero-bolada gutxienez beste 24 orduz luzatuko delakoan, bero-kolpeak saihesteko, identifikatzeko eta horiei aurre egiteko gomendioak luzatu dizkigu igande honetan Felix Zubia Donostia Ospitaleko ZIUko buruak Euskadi Irratiko "Osasun Etxea" saioan.