15 urteko espetxe zigorra ezarri diote Castro Urdialeseko krimenaren akusatuari

Epaileak 15 urteko espetxe zigorra ezarri dio Carmen Merinori, alegia, Castro Urdialeseko krimenaren akusatuari. Epaileak frogatutzat jo du Merinok Jesus Mari Baranda bikotekidea hil egin zuela, eta, horrenbestez, berretsi egin du herri epaimahaiak epaiketan hartutako erabakia; izan ere, herri epaimahaiak erruduntzat jo zuen Merino.

Testuinguru honetan, Kantabriako Auzitegiak 15 urteko kartzela zigorra ezarri dio Carmen Merinori, homizidioagatik, bikotekidea Castro Urdialesen 2019an hil egiteagatik eta haren gorpua ezkutatzeagatik. Garezurra soilik agertu zen, lagun bati eman baitzion. Azaroan, herri epaimahaiarekin egindako epaiketa batean, erruduntzat jo zuten.

Epaia ostiralean eman dute jakitera, eta aukera dago Kantabriako Auzitegi Nagusiaren aurrean helegitea jartzeko. Magistratuaren iritziz, ahaidetasuneko larrigarria ere badago. Gainera, ardura zibilean, bi kalte ordainketa ezarri dizkiote emakumeari: bata, 18.000 eurokoa, biktimaren anaiarentzat; bestea, 20.000na eurokoa, haren semeentzat.

Ebazpenak jasotzen dituen frogatutako gertaeren arabera, emakumeak "modu aktiboan parte hartu zuen" bikotekidearen heriotza eragin zuten gertaeretan. Asmoa zen biktimaren "ondasunez eta diruaz etekina ateratzea", kontuan izanik gizonak "oinordekoa" izendatu zuela bikotekidea testamentuan.

Alderantziz, epaiak zehaztu du ez dagoela frogatuta "aurretik diazepam dosi handirik" eman zionik, hil egiteko eta gizonak ez izateko defendatzeko aukerarik; hori dela eta, baztertu egin dute hilketa delitua, akusazioek kontrakoa eskatzen bazuten ere.

Epaiak gehitu duenez, "aztarna frogek, biktimaren burua topatu izanak eta egindako aditu frogek ekarri dute epaimahaiak egiaztatutzat jotzea akusatuak bikotekidea hil zuela. Gorpua ezkutatu zuen, eta garezurra lagun bati eman zion; azken horri esan zion kaxan sexu jostailuak zeudela. Kontua da jakin bazekiela bikotekidearen senideek salaketa jarriko zutela, eta horrek polizia ikerketara abiatuko zuela. Horren ondorioz, etxea miatuko zioten".

Garezurra gordetzeko arrazoia

Garezurra gordetzeko arrazoiaren gainean, epaiak dio "soilik akusatuak eman ahal duela" hori. Nolanahi ere, gogora ekarri du "bikotekidearen testamentuko xedapen askeko herenaren onuraduna" zela, oinordekoa ere bazela, era bikotea bizi zen etxea utzi ziola.  

"Erraza da ondorioztatzea, beraz, aldentze adierazpenaren bila zebilela, denboran urrundutako heriotza deklarazioaren ordez (desagertu eta hamar urtera). Hala, akusatuak topatzeko erraza zen tokiren bat utzi ahal zuen garezurra. Hala, testamentugilearen heriotzaren baieztapena eskuratu ahal zuen, hiltze deklarazioaren epeei itxaron gabe, eta jaraunspena izan ahal zuen, egokitzen zitzaion zatia", jasotzen du epaiak.

Akusatuak, epaiketan, "ezin zuen, edo ez zuen nahi eman azalpenik frogak indargabetzeko. Horrek berretsi ahal ditu akusazio tesiak". Nabarmendu dituzte, halaber, aztarna ugari izan direla, ez bakarrik garezurra, eta lekuko askok ezeztatu zituztela akusatuaren baieztapenak.

"Zigorrik handiena ezarri behar dugu. Biktimari burua moztu ziotela ezin dugu ahaztu, eta gorpuaren gainerakoa ezkutatu zela ere ez. Kargu frogak ezkutatzea dute helburu horiek, eta gaitzespen handiena jaso behar dute. Zigortuaren esku dago gorpuaren gainerakoa noizbait topatzea".