PSOEk aldebakarrez erregistratu du erreforma, zigorrak handituz eta onespenaren atala bere horretan utzita

"Bai bakarrik da bai" legearen erreforma aurkeztu du goizean PSOEk, Posemos gobernukidearen sinadurarik gabe. Legea indarrean sartu aurreko kartzela zigorrei eutsiko zaie, indarkeriarik izan bada edo biktimaren borondatea bertan behera utzi dutela frogatu bada.

PSOEren arabera, ez da orain arteko arauaren muina ukitu, baimenarena, baina horixe da ukitu dena, Unidas Podemosen arabera.

Patxi Lopez talde sozialistaren bozeramaileak azaldu duenez, erreformaren helburua "lege on batek nahi ez dituen ondorioak zuzentzea" eta sexu-erasotzaileei ezarritako zigorrak arintzeak eragindako "alarma sozialarekin amaitzea" da. Zigorrak handitu eta tarteak murriztu dituzte, erreforma indarrean sartzen denean zigorrak "askoz ere zehatzagoak" izan daitezen.

Lopezek behin eta berriz azpimarratu du ez dela "baimena" ukitu, eta ez dela sexu-abusuaren eta sexu-erasoaren arteko bereizketarik egin. Hala, Berdintasun Ministerioari ziurtatu dio ez dutela inorekin negoziatu gobernu-koaliziotik kanpo, "are gutxiago eskuinarekin", eta legea babesten duten guztiekin akordioa lortzea espero du.

Berdintasun Ministerioaren esanetan, baina, "ulergaitza" da PSOEk erreforma aldebakarrez aurkeztea, "akordioa lortzeko aukerak" bazeudela kontuan hartuta. Albiste agentziei adierazi dietenez, "PSOEk ez du jakinarazi asmo berri hau" eta "PPren proposamen bera aurkeztu eta biolentzia edota intimidazioaren eskemara" bueltatuko diren beldur dira.

"Onarpena milioika emakumek 'bai soilik da bai' aldarrikatuz lortutako konkista" izan zela adierazi dute, eta "kode penalean erdigunean egon dadin ahal duten guztia" egingo dutela adierazi dute.

Irene Montero Espainiako Berdintasun ministroak asteburuan Madrilen egindako ekitaldi batean berriro esan du Unidas Podemosen langa non dagoen eta zertan ez duen atzera egingo. "Onarpenaren kontua ezin da ukitu", esan du.

Ekitaldi horretan bertan, Ione Belarra Eskubide Sozialen ministroa ere ildo beretik mintzatu da, eta eskerrak eman dizkio Monterori, "emakume guztien eskubideen alde gorputz eta arima lan egiteagatik".

Berdintasun ministroak aitortu du "egun zailak" izaten ari direla Gobernua osatzen duten alderdientzat, "presio asko" jasotzen ari direlako.