Errudun jo dute 2022an Bilbon emaztea hil zuen gizona, azpikeriaz egindako hilketa egotzita

2022an Bilboko San Frantzisko auzoko taberna batean bikotekidea hil zuen gizona errudun jo du epaimahaiak, azpikeriaz eta basakeriaz egindako hilketa egotzita.

Emakumeari etengabe tratu txarrak ematea ere leporatu diote gizonari, eta ez dute onartu gizonak alkoholaren eta kokainaren eraginpean jokatu izana. Dena dela, krimena aitortu izana aringarri gisa onartu diote.

Aldeek berretsi egin dituzte epaiketan egindako eskaerak. Horrela, defentsak 20 urteko espetxe zigorra eskatu du hilketagatik eta 18 hilabetekoa tratu txarrengatik. Akusazioek, berriz, 28 urteko zigorra eskatu dute.

Biktima, Rebeca Huayta (45 urte), labankadaz hil zuen senarrak, 2022ko abenduaren 28an.