Salmonellosi-agerraldi batek 12 kaltetu utzi ditu Bizkaian

Salmonellaren agerraldi batek 12 pertsona kaltetu ditu guztira Bizkaian, Eusko Jaurlaritzako Osasun Sailak jakitera eman duenez. Era berean, Osasun Sailak ikerketa abiatu du, agerraldia eragin duten arrautza-sortak identifikatu eta merkatutik kentzeko.

Osasun Sailaren arabera, ikerketa epidemiologikoan egiaztatu dute jatorria ostalaritzako hainbat lokaletan arrautzekin egindako elikagaien kontsumoarekin lotuta dagoela, eta erabili diren arrautzak hegazti-etxalde berekoak direla.

Kaltetutako arrautzak enbalaje-zentrotik banatu dira, Agotzaina SL sozietatearen izenarekin. (ES-1400380/BI) eta agerraldiarekin zerikusia dutenak Aspuru hegazti-ustiategitik datoz (ekoizle-kodea: ES480520000045).

Osasun Sailak azpimarratu duenez, arrautza horiek ontziratu gabe merkaturatzen dira eta, batez ere, ostalaritzarako erabiltzen dira. Gainera, enbalaje-zentroak agerraldi horiekin zerikusirik ez duten eta kontsumitu daitezkeen beste ekoizle batzuen arrautzak merkaturatzen dituela. gaineratu du.

Osasun Sailak dagoeneko eraginpeko produktua ostalaritzako establezimenduetan eta baserrian merkaturatzea debekatzeko eta erretiratzeko kautelazko neurriak hartu ditu.

Halaber, eragindako lote guztietako arrautzen laginak hartu ditu, eta baserria hornitzen duen banaketa-zentroan produktua erretiratzeko eta berreskuratzeko trazabilitatearen jarraipena egingo du.

Era berean, Bizkaiko Foru Aldundiko Nekazaritza eta Abeltzaintza eta Animalien Osasuneko Zuzendaritza dagokion ikerketa eta lagin-bilketa egiten ari da aipatutako baserrian.

Gomendioak

Emaitza analitikoen zain eta zuhurtasun-printzipioa aplikatuta, Osasun Saileko Osasun Publikoko Zuzendaritzak gomendatzen du ez kontsumitzea aipatutako jatorria duten arrautzak eta arrautzekin egindako elikagaiak.

Beraz, enbalaje-zentroaren eta ekoizle-kodearen erreferentzia hori duten arrautzak izan ditzaketen establezimenduei eskatu behar zaie merkaturatzea geldiarazteko eta ez kontsumitzeko.

Era berean, Osasun Sailak herritarrei gogorarazi nahi die udan kontu handiz ibili behar dela tenperatura altuek eragindako elikadura-toxiinfekzioak saihesteko, bereziki salmonella bakterioak eragiten duena, batez ere arrautza elikagaiak egiteko erabiltzearekin lotuta, hala nola tratamendu termiko nahikoa ez duen tortilla eta maionesa.