Segurtasun- eta prebentzio-neurriak iragarri dituzte haizeagatik ezarritako alerta laranjaren aurrean

Euskal Autonomia Erkidegoko erakundeek neurriak iragarri dituzte, igande honetarako haize-bolada gogorrek eragindako alerta laranjaren aurrean.

Igandean, 06:00etatik 15:00etara ezarriko dute alerta laranja, isurialde atlantikoko haizeguneetan orduko 120 kilometroko haizeteak egon daitezkeelako; ondorioz, hainbat ekitaldi bertan behera geratuko dira eta zenbait parketarako sarbideak itxiko dituzte. 

Kirol-probak eta -jarduerak

Donostiako Zurich Maratoiaren antolatzaileek iragarri dutenez, proba bertan behera geratu da distantzia guztietan (10 km, 21 km eta 42 km), "agintari eskudunek igorritako muturreko alerta meteorologikoen ondorioz".

"Aurreikuspenen arabera, hego hego-ekialdeko haize-boladak 120 km/h-tik gorakoak izan daitezke isurialde atlantikoko haizeguneetan, batez ere ekialdean, eta horrek arrisku larria dakar parte-hartzaileen, boluntarioen, ikusleen eta antolakuntzan parte hartzen duten langile guztien segurtasunerako", adierazi dute antolatzaileek ohar batean.

Gipuzkoako Aldundiak eta Bizkaiko Aldundiak ere bertan behera utzi dute kanpoko eskola-kirol guztia, haizeagatik ezarritako alerta laranjaren ondorioz.

Halaber, Gipuzkoako Aldundiak bertan behera utzi ditu iganderako aurreikusita zeuden mendiko jarduerak eta uretako kirolak.

Neurri horien arabera, 06:00etatik 15:00etara, mendiko eta orientazioko irteerak bertan behera geratuko dira, bai eta espazio irekietako eskola-kirola ere.

Uretako eskola-kirol jarduerak egiteko debekua 18:00ak arte izango da indarrean, eta eragina izango du arraunean, piraguismoan, surfean, arrantzan, triatloian, belan eta hondartzako boleibolean, besteak beste.

Parkeak itxita

Donostiako Babes Zibilak Donostiako parkeak itxiko ditu igandean, baita Urgull mendirako sarbidea eta Santa Klara uharterako garraioa ere, goizeko seietatik aurrera. 

Debekatuta egongo da sartzea Aieteko Parkera (Kultur Etxera izan ezik), Cristina Enea parkera eta Miramarrera (Loretopearen eta Mirakontxaren arteko ibilbidera, Serafin Barojara eta Memoriaren Parkera izan ezik). Neurriak azaroaren 26ra arte egongo dira indarrean, Udalak zehaztu duenez.

Barakaldon, Munoa finka eta Ramon Rubial lorategi botanikoa itxita egongo dira alerta meteorologikoa indargabetu arte.

Bilbo kontu handiz ibiltzeko eskatu dute

Bilboko Udalak ohar baten bidez jakinarazi duenez, loreontziak eta kalera eror daitezkeen bestelako objektuak kentzeko eta ateak, leihoak eta toldoak ziurtatzeko eskatu die herritarrei.

Obren arduradunei aldamioak eta garabiak ondo lotzeko ere esan diete.

Erlaitzetatik, hormetatik, zuhaitzetatik edo publizitate-hesietatik urruntzeko eta errepideko joan-etorriak saihesteko gomendatu die herritarrei.