Segurtasun dispositibo berezia ostegunerako, Donostiara Herbehereetako 2.000 zale inguru iritsiko baitira

Donostiako Udalak, Realak, Udaltzaingoak eta Ertzaintzak segurtasun dispositibo berezia antolatu dute Realaren eta Ajaxen arteko futbol norgehiagoka dela eta. Partida ostegun honetan jokatuko da, 21:00etan, Reale Arenan.

Dispositiboa zale ugari hurbilduko direlako antolatu da, tartean, Herbehereetatik iritsitako 2.000 zale inguru. Batez ere Amara Berri auzoko eta Anoeta inguruko trafikoari eragingo dio horrek.

Horregatik, Eneko Goia alkateak azaldu duenez, ostegun arratsalde osoan zehar Anoetako sarbideetan eta irteeretan segurtasuna bermatzeko hainbat neurri jarriko dituzte.

Ildo horretan, udal eta segurtasun operazioaren arduradunek dei egiten dute garraio publikoa erabiltzeko eta ibilgailu pribatua saihesteko, baliteke eta une jakin batzuetan trafikoa etetea; futbol taldeen autobusak zelaira iristean, esaterako.

Euskotrenek tren zerbitzu berezia emango du partida dela eta. Itzultzeko trenak izango dira Anoetatik Hendaia, Altza, Lasarte-Oria eta Zumaiarantz. Informazio gehiago behar duten bidaiariek 944 333 333 telefonora jo dezakete, baita langileek artatzen dituzten estazioetara, APP ofizialera eta konpainiaren webgunera ere.

18:00etatik aurrera zirkulazioa etengo da, unean-unean, Urumea pasealekuan zehar, Madril etorbidean (Pio XII.aren plazatik), Errondo pasealekuan (Portutxo plazatik) eta Zorroaga pasealekuan (Toribio Alzaga eta Aita Donostia plazaren artean).

Era berean, arratsaldeko lehen ordutik, ezin izango da ibilgailu pribatuan Anoetako barne-eraztunera sartu. Hori dela eta, estadioaren inguruko instalazioetara (Izotz Jauregia, Carmelo Balda, Paco Yoldi, Antonio Elorza Belodromoa edo Josean Gasca kiroldegia) edozein kirol-jarduera egitera joateko asmoa dutenei oinez edo garraio publikoan joateko eskatu diete.

Ibilgailu pribatuan egin behar izanez gero, Illunbe ingurura bideratuko dira. Han, ibilgailuak aparkatu beharko dituzte, eta, ondoren, oinez sartu beharko dira Anoeta kirol-hiriko eraztunera, GI-20 errepidearen gaineko pasabidetik. Bestalde, Ernest Lluch Kultur Etxea itxita egongo da arratsaldean.

5-1 Amara sektoreko TAO baimena duten bizilagunen ibilgailuak 1-2 Erdialdea, 1-5 Morlans, 5-2 Loiolako Erriberak eta 5-3 Loiola sektoreetan aparkatu ahal izango dira, azaroaren 27tik 29ra (biak barne), sektore horietako auzokoen baldintza berberetan.

Hala ere, pertsona horiek ezin izango dute nahitaez ordaindu beharreko eremuetan (15. eremuak) doan aparkatu ezarritako erregulazio-ordutegiaren barruan.

Nolanahi ere, zaleei "lankidetza" eskatzen zaie, ahal den neurrian, beren ibilgailu pribatuarekin estadioaren ingurura ez hurbiltzeko, eta, esaterako, GI-20 eta GI-40 errepideak erabiltzea gomendatzen zaie, baita egingo diren joan-etorriak aldez aurretik planifikatzea ere.

Goiak nahiago zukeen Ajaxi sarrerarik ez saldu

Donostiako alkateak deitoratu egin du "ospakizunerako arrazoi izan beharko lukeen" hitzordu batek azkenean "pertsona batzuen jokabideagatik buruhausteak eragitea". Goiak ziurtatu duenez, "nahiago izango zukeen Ajaxen jarraitzaileei sarrerarik saldu ez balitzaie, tankerako beste partida batzuetan izan duten portaera ikusita".

"Horretan jarri nahi dut arreta; azkenean badirudi erantzukizuna ez dela inorena, baina ez. Hemen gaizki portatzen den jendea dago. Ajaxen zaleak dira, eta hemengo batzuk ere bai. Dena esango dugu, eta, zoritxarrez, horrek dispositibo bat prestatzera behartzen gaitu", erantsi du.