BJKN epaileak Mouliaari egindako galdeketan izandako jokabidea aztertzen ari da, 900 kexa jaso ditu eta

Botere Judizialaren Kontseilu Nagusiak (BJKN) informazio-eginbide bat abiatu du, 900 kexa eta salaketa baino gehiago jaso baitu Adolfo Carreterok, Iñigo Errejonek Elisa Mouliaari ustez egindako sexu-erasoaren auziko epaileak, salatzailea deklaratu bitartean izandako jokabideagatik.

Botere Judizialaren Kontseilu Nagusiak gaur jakitera eman duenez, Ricardo Conde Diziplina Ekintzaren sustatzaileak informazio-eginbide bat egitea erabaki du hainbat salaketa jaso dituelako, Instrukzioko 47. zenbakiko Epaitegiko titularraren jokabidea dela eta, urtarrilaren 16an Elisa Mouliaa aktoreari egindako galdeketan.

Botere Judizialaren Kontseilu Nagusiak ohar batean azaldu duenez, organoaren arreta zerbitzuak 900 kexa eta salaketa baino gehiago jaso ditu, orain arte, epailearen jokabidea salatzeko, astelehenean salatzailearen eta ikertuaren adierazpenen grabazioa komunikabideetan argitaratu ondoren.

Informazio-eginbidea ebatzi eta gero, espedientea ireki ala ez erabakiko dute.

Aktoreari egindako galdeketan, Adolfo Carretero epaileak askotan zalantzan jarri zuen Mouliaak 2021eko iraileko gau hartan gertatutakoari buruz emandako bertsioa.