Haur eta gazte transexualitateari buruzko Naizen I. Nazioarteko Biltzarra hasiko da astelehenean Bilbon

Haur eta gazte transexualitateari buruzko Naizen I. Nazioarteko Biltzarra egingo dute maiatzaren 5ean eta 6ean Bilbon, EHUren Bizkaia Aretoan.

Naizen adingabe transexualen familien elkarteak antolatuta, jardunaldietan ikertzaileek beren ezagutzak partekatuko dituzte, eta errealitate horri lotutako ebidentzia zientifikoak azalduko dituzte, elkarte horrek jakinarazi duenez.

Hainbat arlotako ordezkariak bilduko dira: ikerketa, hezkuntza, gizarte hezkuntza eta gizarte lana, sexologia, psikologia, psikiatria, endokrinologia, soziologia, administraritza, etab., aktibistak, trans pertsonak, senideak eta haur eta gazte transexualen egoeragatik interesatuta eta haiekin konprometituta dauden pertsonak.

Biltzarreko mahai eta hitzaldietan, hainbat gai jorratuko dituzte, hala nola ikerketaren gaurko egoera: aztergai egongo da zer har daitekeen ebidentziatzat eta zer ebidentzia ditugun gaur egun haur eta gazte transexualei buruz. Halaber, beste gai hauek ere jorratuko dituzte: begirada eta ikuspegi teorikoetan aniztasuna, osasun-zerbitzuetatik eta eskola-eremutik eskaintzen den akonpainamendua, trantsituetan geratzen diren noranzko-aldaketak, eta errealitate ez-bitarrak. Orobat, aukera egongo da trans bizipenak ezagutzeko eta baita familien elkarteen ahotsa entzuteko ere.

Ekitaldia Bilboko Udalarekin eta Eusko Jaurlaritzarekin batera antolatu dute, eta hiru foru aldundien, Osakidetzaren, Kutxabanken, EITBren, Euskal Herriko Unibertsitatearen eta Nafarroako Unibertsitate Publikoaren babesa du.

Naizen irabazi-asmorik gabeko elkartea da, eta Arabako, Bizkaiko, Gipuzkoako eta Nafarroako adingabe transexualen familiak biltzen ditu. 2015ean sortu zuten elkartea 8 familiak, eta gaur egun 300 baino gehiago biltzen ditu. Helburu nagusia familien artean elkarri laguntzeko sareak sortzea da. Elkarteak, gainera, informazioa, prestakuntza eta aholkularitza eskaintzen dizkie familiei zein edozein arlotako profesionalei. Errealitate hau ikusaraztea ere sustatzen du, eta azterlan eta ikerketetan parte hartzen du.

Aingeru Mayor Naizen elkarteko kideak larunbat honetan Radio Euskadin egindako elkarrizketan adierazi duenez, Euskadin egoera beste hainbat tokitan baino hobea bada ere, "haur transexualen egoera hobetzen jarraitu behar dugu".