Aroztegiko zazpi akusatuek "talde antolatuta" osatzen zutela adierazi dute akusazioaren hiru lekukok

Aroztegia proiektuaren lanak oztopatu eta geldiaraztea leporatuta, zazpi baztandar epaitzen hasi dira astelehen honetan Nafarroako Justizia Auzitegian, Iruñean. Horientzat absoluzioa eskatzeko eta elkartasuna adierazteko, dozenaka herritar bildu dira gaur auzitegiaren atarian.

Oiher Urrutia Aroztegiko Elkartasun Komiteko kidearen hitzetan, gaur abiatu den epaiketa ez da zazpi lagunen aurkakoa, "herri oso baten kontrakoa" baizik. "Herri oso baten hitza zapalduko duen epaiketa da", esan du. "Mesfidati" agertu da, eta ez da fido Justiziaz, "orain artekoa" ikusita.

Lehen saioan hitz egin dute akusazioaren lekuko gisa bi guardia zibilek eta hirigintza proiektuaren bazkideetako batek, talde antolatua osatzea eta mehatxu edo zeharkako indarkeria erabiltzea leporatu diete akusatuei, egitasmoa gauzatzea eragozteko. Zazpi akusatuetatik Garbiñe Elizegi Baztango alkate ohia soilik identifikatu dute, eta talde-buru gisa aurkeztu. Hala ere, defentsaren galderei erantzunez onartu dute ez dakitela euskaraz, eta, hortaz, ez zutela ulertzen Elizegik zer esaten zuen.

20 urteko kartzela zigorra eta 56.000 euroko isuna

Zazpiak hirigintza proiektu baten kontrako akanpada batean parte hartzeagatik identifikatu eta auzipetu zituzten. 2021eko apirilean jazo ziren gertakariak. Palacio de Arozteguia SM enpresak 200 luxuzko etxebizitza, golf zelai bat eta lau izarreko hotel bat eraiki nahi zuen Lekarozen (Baztan), 200 biztanle eskas dituen herri batean. Auzipetuek "desobedientzia ekintza horrekin lanak bertan behera geratzea" zuten helburu, baita lortu ere.

Kontua da enpresak auzitara jo zuela, eta protesta horregatik, guztira, 20 urteko kartzela zigorra eta 56.000 euroko isuna eskatzen duela zazpi auzipetuentzat, talde kriminaleko kide izatea egotzita.

Orain arte akordioa lortzeko saiakerak egin ditu Fiskaltzak, baina denek egin dute kale, azkenak, asteon bertan. Aroztegiko Elkartasun Komiteak oharrean azaldu duenez, enpresa talde kriminalaren akusazioa kentzeko prest agertu da, baina ez du erantzukizun zibilarena erretiratu nahi. Komitearen esanetan, hori da enpresak Nafarroako zein Espainiako erakundeei eskatu dizkien "43 milioi euroko kalte-ordainak jasotzeko bide bakarra".

Aroztegiko Elkartasun Komiteak argitu duenez, zazpi auzipetuek "zentzuzko akordioa" lortu nahi izan dute, baina ez daude prest "biziarteko zigor ekonomikoaren arriskua" onartzeko.

Horrenbestez, negoziazioaren bideak huts eginda, epaiketa egin egingo da.

Auzipetuei elkartasuna adierazteko hainbat elkarretaratze eta protesta-ekintza antolatu ditu Aroztegiko Elkartasun Komiteak epaiketa egunetarako.