Sexu-esplotazioaren aurkako makro operazioan atxilotutako bi, espetxera

Ertzaintzak eta Espainiako Poliziak 20 pertsona atxilotu eta 39 emakume askatu zituzten, Hego Euskal Herriko eta Espainiako Estatuko hainbat probintziatan ziharduen sexu-esplotazioko sare baten aurka batera asteartean egin zuten polizia-operazioan. Ertzaintzak atxilotutako 10 lagunetatik bi espetxera bidali ditu gaur epaileak, bost kautelazko neurriekin aske geratu dira, eta beste hiru epailearen erabakiaren zain daude oraindik, EITBk jakin ahal izan duenez. Atxilotuak gaur utzi dituzte epailearen sku.

EITBk egindako elkarrizketa batean, Mikel Trekuk, operazioa egin zuen Ertzaintzaren dibisioko buruak, baieztatu zuen lortu dituztela "operazioaren helburuak", eta, ikerketa ia itxitzat eman dutela.

Ikerketa 2024an hasi zen, Ertzaintzak sarearen berri izan zuen orduan. Ondorioztatu duenez, sexu-esplotaziorako sareak jatorrizko herrialdeetan erakartzen zituen emakumeak, batez ere Brasilen, lan-baldintza hobeak aginduta. Behin Estatuan zeudela, bidaia eta ostatua ordainarazi eta zorra kitatzeko agintzen zieten, eta horretarako prostituzioan aritzera behartzen zituzten. Sareak hainbat sare sozialetako kanalen bidez eskaintzen zituen emakume horien sexu-zerbitzuak, luxuzko prostituzio gisa.

Operazioa astearte goizean hasi zen, ekainaren 3an, eta EAEko eta Estatuko hainbat herri eta hiritara zabaldu zen.

Ertzaintzak atxiloketak eta miaketak egin zituen Gasteizen, Bilbon, Zornotzan eta Basaurin. Bestalde, Polizia Nazionalak Irunen, Iruñean, Logroñon, Santanderren, Zaragozan eta Figueresen (Girona) egin zuen operazioa. Guztira, 20 pertsona atxilotu zituzten, horietatik 12 EAEn, eta 39 emakume askatzea lortu zuten.

Hainbat tokitan egindako miaketetan, atxilotuek erabilitako dokumentazioa, dirua, droga eta ibilgailuak konfiskatu zituzten.

Euskal Autonomia Erkidegoan liberatutako emakumeei GKE espezializatuen laguntza eman zitzaien, biktima diren heinean, egin beharreko tramite administratiboen ondoren.

Atxilotuei delitu hauek leporatu zizkieten: talde kriminala, gizakien salerosketa, inor prostituitzera behartzea, atzerriko herritarrak urratzea, osasun publikoaren aurkako delitua eta kapitala zuritzea.