Sare sozialak gorroto-mezu eta indarkeriarako deiez bete ziren Torre Pachecoko gertakarien ondoren

Sare sozialek gainezka egin zuten arrazismoak eta xenofobiak piztutako gorroto oldea dela eta, Torre Pachecon (Murtzia) izandako istiluen ostean. Uztailaren 6tik 12ra bitartean 138.000 gorroto-mezu baino gehiago argitaratu ziren.

Datu hori jaso du Arrazakeriaren eta Xenofobiaren Espainiako Behatokiak (Oberaxe, gaztelaniaz), uztailaren 9an Murtziako udalerri horretako bizilagun bati egindako erasoaren ondoren, sare sozialetako jarduera aztertzeko beren-beregi egin duen txostenean. Behatokia Gizarteratze, Gizarte Segurantza eta Migrazio Ministerioaren barnean dago, eta Elma Saiz ministroak aurkeztu du gaur, osteguna.

Gertaera horren ondotik, egiezak, desinformazioa, manipulatutako irudiak eta indarkeriazko deialdiak zabaltzen hasi ziren —batez ere Telegram eta horren gisako plataformetan— migratzaileen aurka. Txostenak dioenez, uztailaren 6tik 22ra bitarte, bilakaera nabarmena izan da gorroto-mezuen kopuruari erreparatuta, eta, guztira, 138.000 mezu baino gehiago zenbatu dira.

Unerik gorena uztailaren 12a izan zen, Torre Pachecon manifestazioa deitu zuten egunean. Egun hartan 33.046 argitalpen arrazista detektatu ziren; bezperan, ordea, 6.825 izan ziren. Ondorengo egunetan edukien bolumena jaitsi zen, arian-arian.

Aztertutako aldian, atzemandako gorroto-edukien % 91 Afrika iparraldeko pertsonen aurkakoa zen, % 6 musulmanen aurkakoa eta % 5 afrikarren ondorengoei zuzendutakoa.

Eduki motari dagokionez, % 33 deshumanizazio-mezuak dira eta "zital",  "nazkagarri" eta antzeko esamoldeak barne hartzen dituzte. Edukien % 27k jomugan dituzten giza-taldeak mehatxutzat jotzen dituzte eta indarkeriazko jokabideekin eta segurtasunik ezarekin lotzen dituzte. Mezuen % 23k zuzenean migratzaileak kanporatzera bultzatzen dute, eta etsaitasun esplizitua adierazten dute, "jipoiak ematen” dituztela, “bortxatzen” dutela eta “espainiarrei lapurtzen” dietela aipatuz.

Gehien erabili ziren gako-hitzak "jipoia", "zikina", "aihotza" eta "gaizkilea" izan ziren.

Sare sozialen ardura

Oberaxek zehazten duenez, gorroto-mezuen % 22 baino ez zituzten ezabatu sare sozialetako plataformek. Horrenbestez, Elma Saiz ministroak iragarri du datorren astean plataformen ordezkariekin bilduko dela, horrelako mezuak ezabatu ditzaten. Saizen ustez, "beharrezkoa da plataforma guztiak bat etortzea eta elkarlanean jardutea, askoz ere eraginkorragoa eta azkarragoa izan dadin eta sare sozialetan mezu horiek denbora luzez egon ez daitezen".

Hala ere, zehaztu du ezabatutako gorroto-mezuen portzentajea plataformaren araberakoa dela. Adibidez, zehaztu du TikTokek gehiago ezabatzen dituela. "Baina garrantzitsuena erantzunkidetasun hori eskatzea da", zehaztu du.

Halaber, ohartarazi du mezu horietako asko "delituak" izan daitezkeela.