EHUk Bakearen aldeko Adierazpena sinatu du Hiroshiman, eta Bengoetxea errektoreak Gazako sarraskia salatu du

Euskal Herriko Unibertsitateak (EHU) Hiroshimako Bake Adierazpena sinatu du bonba atomikoa Japoniako hiriaren gainera jaurti zeneko 80. urteurrenean, eta Joxerramon Bengoetxea errektoreak "memoria ariketa egitearen garrantzia" azpimarratu du. "Unibertsitateok gure esku dagoena egitera behartuta gaude, errepika ez dadin eta gertatutakoa ahaztu ez dadin", ziurtatu du. Zentzu horretan, Gazako sarraskia salatu eta nazioarteko erantzun bateratu baten alde egitea eskatu du.

Nazioarteko hamaika unibertsitatek bakearen aldeko adierazpena sinatu dute HU-Higashisendako campusean, Hiroshimako Unibertsitatean, besteak beste, Tokio, Leipzig, Taiwan, Malaysia, Italia, Polonia, Suedia eta Euskal Herriko unibertsitateek.

Manifestuan konpromisoa hartu dute unibertsitateen arteko lankidetza sustatzeko, ikasleen eta ikertzaileen trukearen bidez bakearen kultura suspertzeko.

EHUko errektoreak, Gernikako bonbardaketaren 88. urteurrena gogorarazteaz gain, bi hiriek azken hamarkadetan egindako "memoria ariketaren" garrantzia nabarmendu du.

Diktadura, trantsizioa eta desinformazio ofiziala

"Euskal Herrian bizi izan dugun zerbait da, ez bakarrik Gernikagatik, baizik eta ondoren gertatu ziren gertakari guztiengatik, desinformazio ofizialari aurre egiteko eta ezkutuko errealitate historikoa ikusarazteko", adierazi du.

Bengoetxeak gogorarazi duenez, "euskal herritarrek diktadura bizi izan zute, baita trantsizio luzeko indarkeria urteak ere".

"Unibertsitateok gure esku dagoena egitera behartuta gaude, berriro gerta ez dadin eta gertatutakoa ahaztu ez dadin. Unibertsitateek ezagutza babesteko ardura berezia dute, ikertzeko eta gure ikasleak prestatzeko, beren eguneroko bizitzan justizia, zuzentasuna eta elkar ulertzea landu dezaten", erantsi du.

Bere ustez, hezkuntza eta ikerketa "funtsezko oinarriak dira etorkizun ekitatibo eta jasangarri baterako, elkarrizketa kritikoa bultzatzen dutelako, elkar ulertzea elikatzen dutelako eta elkarlanerako eta bizikidetzarako baldintzak sortzen laguntzen dutelako, horiek beharrezkoak baitira bakeari eusteko ".

EHUko errektorea Bakearen Zeremonian ere izan da, bonba atomikoa jaurti zen egun eta ordu berean.