Hiru pertsona hil dira dagoeneko Espainiako suteetan

10.000 pertsona inguru ebakuatu behar izan dituzte Espainiar Estatuan suteen ondorioz, eta Gaztela eta Leonen eta Galizian gehienak. Zamora, Leon eta Ourensen hogeita hamar bat sute aktibo daude eta horiek dira fokurik bortitzenak, horietako 14 larriak baitira.

Hiru pertsona hil dira suteen ondorioz. Hirugarrena, Leongo Ospitalean ospitaleratuta zegoen 37 urteko gizonezko bat, Molezuelas de la Carballeda (Zamora) herrian hasi eta Leon probintzia zeharkatu zuen sutearen sugarrei aurre egiten ari zela izandako erreduren ondorioz.

Nicanor Sen Espainiako Gobernuak Gaztela eta Leonen duen ordezkariak baieztatu duenez, Nogarejasen (Leon) sugarrek erreta hil zen beste gizonarekin batera larri zauritu zen, eta orain hil da. 

Zamora probintzian, igandean Molezuelas de la Carballeda udalerrian hasi eta Leongo muga indarrez gainditu duen suak inoiz Espainiako Estatuan izan den suterik handiena da, datuak jaso zirenetik. Gaztela eta Leongo berrogeita hamar udalerri baino gehiago ebakuatu behar izan dituzte, eta 10.000 pertsonari aldi baterako babesa eman diete dute La Bañeza, Astorga edo Ponferrada herrietan. Kaltetuen artean, adin guztietako pertsonak daude, 100 urtetik gorakoak, haurrak dituzten familiak eta bertan uda igarotzen dutenak barne. Bi pertsona daude ospitalean, erredura handien unitatean.

Galizian ere egoera kezkagarria da. Haizeak eta orografia zailak zaildu egiten dute sua itzaltzeko lanak, eta Ourense trenez inkomunikatuta geratu da goi-lautadarekin. Probintzia da kaltetuena, 13.000 hektarea baino gehiago daude kiskalita eta herrigune berriak konfinatuta daude sugarrak hurbil daudelako. Uneotan Galizian dagoen bigarren sute handiena Oimbrakoa da, eta sua itzaltzeko lanetan ari ziren hiru udal brigadista zauritu dira arratsaldean.

Caceresen, Jarillako suteak kontrolatu gabe jarraitzen du. Larrialdi zerbitzuak alerta gorenean egon dira goizaldean haize bortitzak direla eta, eta Cabezabellosako bizilagunak ebakuatu dituzte, agintarien aginduei entzungor egin ostean.

Ostegun arratsaldean, hogei bat herrik ebakuatuta jarraitzen dute, eta N625 errepidea itxi dute Leon-Santander artean, Leongo Portilla de la Reina eta Llanaves de la Reina udalerrien artean, Riaño eskualdeko Barniedo de la Reina herrian piztutako baso-suteak aurrera egin duelako.

Era berean, Salamancan, La Alberca udalerrian kaltetutako urbanizazioen konfinamendua altxatu da, inguru horretan berraktibatu zen sutea kontrolpean hartu ondoren. Uneotan kezkagarria den sute bat piztu da Gallegos de Argañanen.

Bestalde, Mallorcako suhiltzaileak Manacorreko eremu batean piztutako baso-sute bat itzaltzen saiatzen ari dira, zehazki, Ma-15etik gertu, araztegiaren parean. 19:30ean, sua kontrolpean hartu dute.

Aurreikuspenak ez dira positiboak: gaurko tenperaturak igotzea espero da eta horrek ez du lagunduko Estatuko eremu zabaletan kritikoa izaten jarraitzen duen egoera arintzen.