EHUk munduko 400 unibertsitate onenen artean jarraitzen du

EHUk munduko 400 unibertsitate onenen artean jarraitzen du, unibertsitate campusen mundu mailako sailkapenik entzutetsuena den Shanghaiko rankingaren aurtengo edizioaren arabera.

20.000 unibertsitate baino gehiagoren artean, 2.500 ikastetxe aztertu ditu zerrendak, eta 1.000 onenak argitaratu ditu rankingean. Zerrendak Espainiako 36 unibertsitate biltzen ditu, eta EHU zortzigarrena da, euskal erakundeak ohar baten bidez adierazi duenez.

"Unibertsitateen arteko lehia gero eta handiagoa da, unibertsitate espezializatuek lehen postuak betetzen dituztelako. Horrexegatik hartzen du garrantzi handiagoa EHUk mundu mailan duen posizioak", azaldu du Joxerramon Bengoetxea errektoreak.

Bestalde, Juan Ignacio Perez Iglesias Eusko Jaurlaritzako Zientzia, Unibertsitate eta Berrikuntza sailburuak uste du egungo testuinguruan "meritu berezia" duela Shanghaiko rankingean EHUk munduko 400 onenen artean jarraitzeak.

Perez Iglesiasek ohartarazi du sailkapen horiek ez direla sakralizatu behar, eta gogorarazi du gaur egun Txinako eta Taiwango unibertsitateak "indarrez" ari direla sartzen zerrenda horretan, "gero eta posizio altuagoak hartzen eta historikoki ondo kokatutako beste erakunde asko beherantz eramaten".

"Munduko elite honetan sendo mantentzeak Euskal Herriko Unibertsitatearen kalitate akademikoa eta ikertzailea erakusteaz gain, nazioarteko egoera gero eta zorrotzagoan maila gorenean lehiatzeko gaitasuna ere erakusten du", adierazi du.

2024koarekin alderatuta, tarte bat egin du gora Nafarroako Unibertsitateak  (501-600). Gainera, Bordeleko Unibertsitatea (Baionako campusa horren menpe dago) 300 onenen artean dago.

Espainiako lehen hamarren zerrenda iazko berdina da. Estatukoen artean postu onenean Bartzelonako Unibertsitatea dago, eta iazko estatusari eutsi dio (lehen 200en artean), eta hauek ageri dira gero: Valentziako Unibertsitatea (201-300); Bartzelonako eta Madrilgo Autonomoa, Complutense, Pompeu Fabra, Granada eta EHU (301-400), eta Valentziako Politeknikoa eta Sevillakoa (401-500). 

23 urtez jarraian, Harvard dago munduko sailkapenaren buruan, Stanford eta Massachusettseko Institutu Teknologikoa (MIT) daude ondoren, eta hauek dira jarraian: Cambridge (4), Berkeley (5), Oxford (6), Princeton (7), Caltech (8), Columbia (9) eta California Institute of Technology (10). Lehenengo hamarren artean agertzen diren unibertsitate guztiak AEBkoak dira, Cambridge eta Oxford britainiarrak izan ezik.

Europa kontinentalean, zerrendako lehen unibertsitatea Paris-Saclay da, eta eremu horretan lider izaten jarraitzen du, 13. postuan; ondoren, Zuricheko ETH dago, 22.ean.

Asiakoen artean, Tsinghuakoak (18) lau postu egin du gora, eta Asiako onena da; Melbournekoak (38), berriz, Ozeaniakoen sailkapenaren buru da hamabost urtez jarraian.

Zerrendak sei adierazle aztertzen ditu: Nobel saria edo Fields domina jaso duten ikasleen kopurua; Nobel edo Fields domina jaso duten irakasleen kopurua; ikertzaileen aipuak; Nature eta Science aldizkarietako artikuluak, per capita errendimendu akademikoa eta Science Citacion Index Expanded and Social Science Citacion Indexeko lanak.