Askatu dituzte Vueltako etapan Bilbon atxilotutako hiru lagunak

Israel-Premier Tech taldearen parte-hartzearen aurkako protestetan parte hartzeagatik Espainiako Vueltako etapan Bilbon atxilotutako hiru pertsonak aske geratu dira, polizia-izapideak egin ostean eta epaileak noiz deituko zain, Ertzaintzak jakitera eman duenez.

Mobilizazio horietan beste bost pertsona ere identifikatu zituzten, eta Ertzaintzako lau agentek min hartu zuten.

Istilu horien ondorioz, Vueltako antolatzaileek erabaki zuten Bilboko Kale Nagusian amaitzekoa zen etapa bertan behera uztea eta txirrindularien denborak neurtzeko hiru kilometro lehenagokoak aintzat hartzea, segurtasun-baldintzak betetzen ez zirela iritzita, hainbat pertsona babes-hesiak bota eta galtzadan sartu baitziren. 

Etaparen amaiera 3 km aurreratu dute

Israelen genozidioaren aurkako protestek eta Palestinarekiko elkartasun adierazpenek Bizkaiko errepideak hartu zituzten atzo, Espainiako Vuelta zela eta. Bilbon, milaka pertsona bildu ziren helmugan, Palestinako banderak zeramatzatela.

Egoera horren aurrean, "segurtasun arrazoiengatik", eta helmugan gerta zitezkeen gorabeheren aurrean, antolatzaileek helmuga 3 kilometro aurreratzea erabaki zuten, eta ez zen etapako irabazlerik egon: "Sailkapen orokorreko denborak neurtzeko, helmugatik 3 kilometrora egindakoak hartuko dira", adierazi zuten.

Milaka pertsona bildu ziren Vueltako hamaikagarren etaparen helmugan, Bilbon, "Palestina askatu" dezatela aldarrikatzeko eta Israelek egindako genozidioa salatzeko.

Gernika-Palestina plataformak egin zuen deia, Israelgo Premier Tech taldeak parte hartzen duen txirrindularitza proban Israelek Gazan izan duen jarreraren aurka mobilizatzeko, alegia.

Bilboko Kale Nagusiko bi aldeetan bildu zirenek ikurrinak eta Palestinako banderak zeramatzaten, eta Israelen eta genozidioaren aurkako zein aldarriak Palestinaren aldeko oihuak bota zituzten.

Mezuak areagotu egin ziren tropela, aurreikusita zegoen bezala, helmugatik lehenengoz igaro zenean, Gangurenetik bigarren igoerari eta Pike Bideari aurre egin eta Bilbon amaitu aurretik.

Etapa hasi baino lehentxeago, taldeen ordezkariak eta lasterkeren antolatzaileak bildu ziren, txirrindularien segurtasuna eta Israelgo taldeak protesten aurrean duen jarraipena aztertzeko. Talde batzuek lehiaketatik kanporatzeko aukera jarri omen zuten mahai gainean.

Bere aldetik, Israel-Premier Tech txirrindularitza taldeak ohar bidez adierazi zuen Vueltan lehiatzen jarraituko duela, Bilbon izandako protestak gorabehera, ekintza horiek “arriskutsuak eta beren helburua lortzeko kaltegarriak” direla iritzita. Taldeak azpimarratu zuen protestarako eskubidea “errespetatzen” duela, “baldin eta modu baketsuan egiten bada, eta tropelaren segurtasuna arriskuan jarri gabe”.

Era berean, eskerrak eman zizkien antolatzaileei eta Poliziari segurtasuna bermatzeko egindako ahaleginagatik. Taldearen arabera, manifestarien jokabideak txirrindularien integritatea “arriskuan” jarri zuen, eta deitoratu du euskal zaleak etaparen amaiera ondo-ondo bizitzea galarazi zutela, horiek “munduko jarraitzailerik onenak” direla gogorarazita. Azkenik, taldeak eskertu zituen TNBren, antolatzaileen, gainerako taldeen, txirrindularien eta zaleen babesa.

Gernika-Palestina plataformak azpimarratu zuen "esan daitekeela etapa Palestinak irabazi duela" 2025eko Vueltan, baina azpimarratu zuen "genozidioaren aurkako konpromisoak biderkatu" egin behar direla, mobilizazio gehiago eginda.

"Txirrindulariak etaparen aurreko bilerekin, zaleak euren ikurrekin nonahi, erakundeetako ordezkariak euren adierazpenekin... jakitun dira Israel taldea ez dela ongi etorria eta gaurko etapan gertatutakoak argi eta garbi erakusten du sportwashinga ez dela bidea", azpimarratu zuen plataformak, ohar bidez.

Azpimarratu zuenez, "helburua bakarra zen, eta hala izaten jarraitzen du: Israel-Premier Tech Vueltatik kanpo uztea eta Israelgo talde guztiak, apartheid eta genozidioaren enbaxadoreak, kirol lehiaketa guztietatik kanpo uztea".

Era berean, Gernika-Palestinak dei egin zion euskal gizarteari ostiral honetan udaletxeen aurrean egingo dituen elkarretaratze eta kazeroladetan parte hartzera. 

Bingen Zupiria Eusko Jaurlaritzako Segurtasun sailburuak deitoratu egin zituen etaparen amaiera aurreratzera behartu zuten "gizalegearen kontrako portaerak", "segurtasunaren eta bizikidetzaren aurkakoak" direlakoan, eta "lotsa" sentitu du, EH Bildu gertatutakoaz "harro" agertu da eta, koalizioaren idazkari orokorrak esandakoari erreferentzia eginez.