Benjamin borraskak hainbat intzidentzia eta gorabehera eragin ditu, gehienak errepideetan
Kamioi batek artaziarena egin du N-1ean, Villabona parean, eta errepidea itxi behar izan dute Donostiara bidean. 09:00ak aurretik ezbeharra izan duen Ibilgailua erretiratu dute. Halaber, haize-ufada zakarren ondorioz, zuhaitz bat bidera erori da Meñakan, eta BI-631 errepidea guztiz itxi dute, Bermeora bidean.
Benjamin borraskak 146 km/h-ko haize-ufadak eta zaparrada mardulak utzi ditu Euskal Herrian, eta eragozpenak eragin ditu, gehienak errepideetan.
Denboralea dela eta, Eusko Jaurlaritzako Segurtasun Sailak abisu horia ezarri du Bizkaian eta Gipuzkoan 14:00ak arte, haizeagatik. Gainera, nabigaziorako alerta laranja indarrean dago kostaldean, 08:00etatik 14:00etara, 5 metrotik gorako olatuak espero direlako. Aurretik eta ondoren abisu horia aktibatuko da. Horrez gain, Aemetek abisu horia aktibatu du Nafarroa iparraldean eta Erriberan haizeagatik, eta Meteofrancek, berriz, alerta laranja haizeagatik eta olatuengatik Ipar Euskal Herria barne hartzen duen Pirinio Atlantikoetan.
Euskalmetek zabaldutako datuen arabera, 167 km/h-ko boladak neurtu dira Matxitxakon (Bizkaia) eta 120 km/h-koak Santa Clara uhartean (Donostia). Dena den, arratsaldean haizeak baretzera egingo duela dio iragarpenak.
Esan bezala, haizeak batez ere errepideetan eragin ditu eragozpenak. N-1 errepidean kamioi batek artaziarena egin du goizeko lehen orduan Villabona parean, Donostiara bidean, eta errepidea guztiz itxi behar izan dute.
Ibilgailu astuna gurutzatuta gelditu da Donostiara bidean, bi erreiak hartuta.
08:45 aldera ezbeharra izan duen kamioia erretiratu eta bidea berriro zabaldu dute. Hiru orduren ondoren, eguerdian, zirkulazioa normaltasunera itzuli da. Auto ilarak 17 kilometrorainokoak izan dira.
Ezbeharra 06:10ean gertatu da, eta ez da inor zauritu.
Ez da hori gaur goizean N-1ean gertatu den istripu bakarra izan. N-1 errepideak eta A-15ak bat egiten duten tokian, Andoainen, bi ibilgailuk txapa-istripua izan dute eta auto-ilarak sortu dira puntu horretan.
AP-68 errepidean bizpahiru istripu gertatu dira, Zuia (Araba) parean, eta ilarak sortu dira Bilbora eta Gasteizera bidean.
N-622 errepidean, Foronda parean, hiru kilometroko auto ilarak sortu dira Gasteizera bidean egiten ari diren herri-lanek eraginda.
Halaber, pertsona bat zauritu da BI-636 errepidean, Gueñesen (Bizkaia) gidatzen ari zen ibilgailua bidetik atera eta iraulita.
Gorabeherak aireportuetan
Haize denboralearen ondorioz, Bartzelonatik irten diren bi hegaldik ezin izan dute Bilboko aireportuak lur hartu eta Kataluniako hiriburura itzuli behar izan dute.
Donostiako aireportuan, berriz, Madrildik Donostiako aireportura iristekoa zen hegaldi bat Bilbora desbideratu dute.
Edukiontziak iraulita Bermeon. Argazkia: Europa Press
Zuhaitzak eta adarrak errepidean
Benjamin borraskak eragindako haize-ufada bortitzen ondorioz, zuhaitz bat bidera erori da Meñakan, eta BI-631 errepidea (Sollubeko mendatetik barrena Mungia eta Bermeo lotzen dituena) guztiz itxi behar izan dute, Bermeora bidean.
Zuhaitza bidetik kendu eta errepidea zabaldu ostean, zirkulazioa normaltasunera itzuli da.
Bizkaiko Foru Aldundiko larrialdi zerbitzuek 12 esku hartze egin dituzte eguerdira arte. Irteera gehienak zuhaitzak kentzeko edo bide publikoan "traba" egiten zuten elementuak erretiratzeko izan dira, Ager Izagirre Bizkaiko Herri Administrazio eta Nazioarteko Harremanetarako diputatuak azaldu duenez.
Donostiako suhiltzaileek 30 irteera inguru egin dituzte haize denboralea dela eta, udal iturriek jakinarazi dutenez. Gehienak zuhaitzak erretiratzeko edo eraikinetatik eroritako elementuak kentzeko izan da.
Haize-ufada horiek direla eta, Segurtasun Sailak arretaz gidatzea gomendatzen du.
Benjamin borraskak bost metrotik gorako olatuak eragin ditu euskal kostaldean
Parkeak eta pasealekuak itxita, Donostian
Haizea eta denboralea tarteko, Donostiako Udalak hiriko hainbat parke eta pasealeku itxi ditu.
Hortaz, ostegun honetan itxita egongo dira: Pasealeku berria, Haizearen Orrazirako sarbidea, Zurriolako espigoia eta Miramar, Cristina Enea, Urgull eta Aieteko parkeak (Kultur etxeko sarbidea izan ezik).
Gizarteari buruzko albiste gehiago
Bilboko gazte bat ikertzen ari dira, TikTok bidez makila-estokeak fabrikatu eta saltzeagatik
Bilboko Udaltzaingoak izapideak ireki ditu San Adriango bizilagun baten aurka. 33 urteko gizonak makila-estokeak fabrikatu eta saltzen zituela zabaltzen zuen sare sozialetan, bideoen bidez.
45 urte Ortuellako tragediatik, oraindik sendatu ez den zauria
1980ko urriaren 23an, 50 adingabe eta 3 heldu hil ziren Marcelino Ugalde ikastetxe publikoan, gas-leherketa batean. Eskola jada ez da existitzen, baina tragedia haren minak oroimenean irauten du, 45 urte geroago.
Sute izugarri batek Zumaiako baserri bat erre du
Ez da inor zauritu, eraikina hutsik zegoelako. Suhiltzaileak bertaratu dira, sutea itzalitzeko eta sutea zerk eragin duen jakiteko. Zumaia eta Getaria lotzen dituen N-634 errepidea itxi behar izan dute, garrak itzali arte.
Eusko Jaurlaritzak jarduera fisikoa eta ongizatea sustatzeko Mugiment Mahaia aurkeztu du
Mugiment Mahaiaren helburua aldaketa soziala sortzea da, sinergiak sortuz eta modu koordinatuan lan eginez.
Gasteizko Judimendi parkeko lanak geldiarazi dituzte, aztarna arkeologikoak aurkitu dituzte eta
Hezur-hondarrak aurkitu zituzten tirolina eta beste jolas batzuk jartzeko lanak gauzatzen ari ziren bitartean.
EHUko Arabako campusa kerik gabeko lehen unibertsitate eremu bihurtu da
Kerik Gabeko Guneen Sarearekin bat egin duen lehen unibertsitate-eremu bihurtu da Euskal Herriko Unibertsitatearen Arabako campusa. Sarea 2021ean sortu zuen Eusko Jaurlaritzak, Euskadiko foru-aldundiekin eta udalekin lankidetzan, eta, besteak beste, tabakoa eta horren deribatuak (lurrungailuak, esaterako) kontsumitzen hastea prebenitzea eta zigarrokinek eragindako kutsadura saihestea du helburu.
Osakidetzak txertaketa-zentro bat jarriko du Bilbon, gripearen aurkako txertoa aldez aurreko hitzordurik gabe jasotzeko
Ostiral honetatik aurrera, Bilboko Casillako pabilioian 15 postu jarriko dituzte, herritar guztiek, 08:00etatik 20:00etara, gripearen aurkako txertoa jartzeko, aldez aurretik hitzordua eskatu beharrik gabe, pandemian egin zuen bezala.
Leticia Landa estatubatuarrak irabazi du Basque Culinary World Prize 2025 saria
Joan Roca buru izan duen epaimahaiak Landa saritzea erabaki du, La Cocina proiektuan egin duen lanagatik. San Frantziskon (AEB) sukaldaritza munduan sartu nahi duten eta bazterketa-egoeran dauden komunitateetako talentudunei zuzendutako proiektua da.
Kaio hankahori batek hegazti-gripea duela hauteman dute Lasarte-Orian
Udalak "hildako zein gaixotutako hegaztiekin, haien gorotzekin eta jariakinekin kontakturik ez izatea" gomendatu du.