Haizeak 167 km/h-ko abiadura gainditu du Matxitxakon eta 120 km/h-ko boladak neurtu dira Donostian, denboralearen eraginez                                      

Euskal Herria astintzen ari den Benjamin borraskak gogor astindu ditu Euskal Herriko bazterrak. Matxitxakon (Bermeo) eta Santa Klara uhartean (Donostia) 167 km/h-ko eta 120 km/h-ko boladak neurtu dituzte, hurrenez hurren. 

Haizearen ondorioz, olatu handiak neurtu dira euskal kostaldean: 6,6 metrorainokoak Pasaiako buian eta 4,9 metrokoak, Bilboko portuan. 

Eusko Jaurlaritzako Segurtasun Sailak haizeari dagokion abisu horia aktibatu du Bizkaian eta Gipuzkoan (14:00ak arte). 

Gainera, nabigaziorako alerta laranja indarrean dago kostaldean, 08:00etatik 14:00etara, denboraleak 5 metrotik gorako olatuak eragingo dituelako. Aurretik eta ondoren abisu horia aktibatuko da, egunaren amaierara arte. 

Horrez gain, itsasaldeko arriskuagatik abisu horia ezarri du Segurtasun Sailak 20:00ak arte, eta arreta eskatu du bereziki pasealeku eta malekoi inguruetan. 

Abisuak eta alertak Nafarroan eta Ipar Euskal Herrian

Nafarroan, haizeari dagokion abisu horia 18:00etara arte egongo da indarrean iparraldean, eta 14:00etara arte, berriz, Erriberan.

Gainera, Meteofrancek alerta laranja ezarri du Pirinio Atlantikoetan, haizeagatik (06:00-15:00) eta olatuengatik (04:00-10:00).