Benjamin borraskak hainbat intzidentzia eta gorabehera eragin ditu, gehienak errepideetan
Kamioi batek artaziarena egin du N-1ean, Villabona parean, eta errepidea itxi behar izan dute Donostiara bidean. 09:00ak aurretik ezbeharra izan duen Ibilgailua erretiratu dute. Halaber, haize-ufada zakarren ondorioz, zuhaitz bat bidera erori da Meñakan, eta BI-631 errepidea guztiz itxi dute, Bermeora bidean.
Benjamin borraskak 146 km/h-ko haize-ufadak eta zaparrada mardulak utzi ditu Euskal Herrian, eta eragozpenak eragin ditu, gehienak errepideetan.
Denboralea dela eta, Eusko Jaurlaritzako Segurtasun Sailak abisu horia ezarri du Bizkaian eta Gipuzkoan 14:00ak arte, haizeagatik. Gainera, nabigaziorako alerta laranja indarrean dago kostaldean, 08:00etatik 14:00etara, 5 metrotik gorako olatuak espero direlako. Aurretik eta ondoren abisu horia aktibatuko da. Horrez gain, Aemetek abisu horia aktibatu du Nafarroa iparraldean eta Erriberan haizeagatik, eta Meteofrancek, berriz, alerta laranja haizeagatik eta olatuengatik Ipar Euskal Herria barne hartzen duen Pirinio Atlantikoetan.
Euskalmetek zabaldutako datuen arabera, 167 km/h-ko boladak neurtu dira Matxitxakon (Bizkaia) eta 120 km/h-koak Santa Clara uhartean (Donostia). Dena den, arratsaldean haizeak baretzera egingo duela dio iragarpenak.
Esan bezala, haizeak batez ere errepideetan eragin ditu eragozpenak. N-1 errepidean kamioi batek artaziarena egin du goizeko lehen orduan Villabona parean, Donostiara bidean, eta errepidea guztiz itxi behar izan dute.
Ibilgailu astuna gurutzatuta gelditu da Donostiara bidean, bi erreiak hartuta.
08:45 aldera ezbeharra izan duen kamioia erretiratu eta bidea berriro zabaldu dute. Hiru orduren ondoren, eguerdian, zirkulazioa normaltasunera itzuli da. Auto ilarak 17 kilometrorainokoak izan dira.
Ezbeharra 06:10ean gertatu da, eta ez da inor zauritu.
Ez da hori gaur goizean N-1ean gertatu den istripu bakarra izan. N-1 errepideak eta A-15ak bat egiten duten tokian, Andoainen, bi ibilgailuk txapa-istripua izan dute eta auto-ilarak sortu dira puntu horretan.
AP-68 errepidean bizpahiru istripu gertatu dira, Zuia (Araba) parean, eta ilarak sortu dira Bilbora eta Gasteizera bidean.
N-622 errepidean, Foronda parean, hiru kilometroko auto ilarak sortu dira Gasteizera bidean egiten ari diren herri-lanek eraginda.
Halaber, pertsona bat zauritu da BI-636 errepidean, Gueñesen (Bizkaia) gidatzen ari zen ibilgailua bidetik atera eta iraulita.
Gorabeherak aireportuetan
Haize denboralearen ondorioz, Bartzelonatik irten diren bi hegaldik ezin izan dute Bilboko aireportuak lur hartu eta Kataluniako hiriburura itzuli behar izan dute.
Donostiako aireportuan, berriz, Madrildik Donostiako aireportura iristekoa zen hegaldi bat Bilbora desbideratu dute.
Edukiontziak iraulita Bermeon. Argazkia: Europa Press
Zuhaitzak eta adarrak errepidean
Benjamin borraskak eragindako haize-ufada bortitzen ondorioz, zuhaitz bat bidera erori da Meñakan, eta BI-631 errepidea (Sollubeko mendatetik barrena Mungia eta Bermeo lotzen dituena) guztiz itxi behar izan dute, Bermeora bidean.
Zuhaitza bidetik kendu eta errepidea zabaldu ostean, zirkulazioa normaltasunera itzuli da.
Bizkaiko Foru Aldundiko larrialdi zerbitzuek 12 esku hartze egin dituzte eguerdira arte. Irteera gehienak zuhaitzak kentzeko edo bide publikoan "traba" egiten zuten elementuak erretiratzeko izan dira, Ager Izagirre Bizkaiko Herri Administrazio eta Nazioarteko Harremanetarako diputatuak azaldu duenez.
Donostiako suhiltzaileek 30 irteera inguru egin dituzte haize denboralea dela eta, udal iturriek jakinarazi dutenez. Gehienak zuhaitzak erretiratzeko edo eraikinetatik eroritako elementuak kentzeko izan da.
Haize-ufada horiek direla eta, Segurtasun Sailak arretaz gidatzea gomendatzen du.
Benjamin borraskak bost metrotik gorako olatuak eragin ditu euskal kostaldean
Parkeak eta pasealekuak itxita, Donostian
Haizea eta denboralea tarteko, Donostiako Udalak hiriko hainbat parke eta pasealeku itxi ditu.
Hortaz, ostegun honetan itxita egongo dira: Pasealeku berria, Haizearen Orrazirako sarbidea, Zurriolako espigoia eta Miramar, Cristina Enea, Urgull eta Aieteko parkeak (Kultur etxeko sarbidea izan ezik).
Tren-zerbitzua, etenda
Ipar Euskal Herria ere gogor astindu dute haize-ufadek. Zokoan, esaterako, 126 km/h-ko ufadak erregistratu dira goizeko lehen orduan. Lapurdiko hainbat herritan neurriak hartu dituzte, eta hondartzetarako sarrerak itxita egongo dira egun osoan. Biarritzen, esaterako, arez betetako 200 bat zaku ipini dituzte hondartzako pasealekuan.
Trenbide-sareari ere eragin dio denboraleak: zerbitzua etenda dago Hendaia eta Bordele artean, eta Hendaia eta Donibane Garazi artean.
Zure interesekoa izan daiteke
Kontrolpean dago Derion, Loiuko aireportutik gertu, piztu den sutea
20:30 aldera sutea piztu da zen atzo Derion, Loiuko aireportutik oso gertu. Sua San Isidro auzoko baso batean piztu zen, Aiartza mendian, eta gauean lanean arituta, kontrolpean izatea lortu dute suhiltzaileek. Suteak ez du eraginik izan aireportuaren funtzionamenduan.
Posible al da adimen artifizialaren garapena gelditzea?
Adimen artifiziala garatzen duten enpresa nagusietako buruek galga jartzeko eskaria egin dute azken aste hauetan, gizakion kontroletik ihes egiteko arriskua izan dezakeela eta. Baina posible al da? Eta zergatik adierazten dute orain beldur hori? Hainbat aditurekin zalantza hauek argitu ditugu.
Gizon bat hil da Laidatxu hondartzan (Mundaka)
Gizonezkoa uretatik atera behar izan dute sorosleek, eta suspertzen saiatu diren arren, bertan hil da. Ez dakite zerk eragin duen heriotza.
Aldaketa asteartetik aurrera, eta euria asteazkenerako zein ostegunerako
Astearte goiza eguzkitsua eta beroa izango da, baina iluntzerako aldaketa iritsiko da eta asteazkenean tenperaturek nabarmen egingo dute behera. Euria egingo du bai asteazkenean baita ostegunean ere.
Zaldibiatik Ordiziarainoko bidea oinez egin dute dozenaka ikaslek eta gurasok, eskola garraioa ez kentzea eskatzeko
Iazko ekainean, Hezkuntza Sailak Zaldibiako ikasleen gurasoei jakinarazi zien 2026-27 ikasturtetik aurrera DBH3 eta DBH4ko gazteak eskola-garraiorik gabe geratuko zirela. Emandako arrazoia eskola batetik besterako distantzia izan zen.
Gustuko oporlekua lortzeko itxaropenez gerturatu dira Imsersoko lehen bidaiariak agentzietara
Nafarroan astelehen honetan hasi dira agentziak adinekoei zuzendutako bidaia horien erreserbak kudeatzen. Lehen egun honetan, Imsersorekin lehen aldiz oporretara joango direnek izan dute bidaia eskuratzeko aukera. EAEn asteazkenean hasiko dira.
EHUk urte akademikoa abiatu du, AAren arriskuez jakitun eta "eredu propioa" aldarrikatuz
Joxerramon Bengoetxea errektoreak azpimarratu du auzia ez dela adimen artifiziala "deabrutzea, harekiko erabateko mendekotasuna" saihestea baizik. Finantzaketari dagokionez, Juan Antonio Perez Iglesias sailburuak uste du "egingarria" dela bost urteko epean finantzazioa Europako mailara iristea.
Olarizuk agur esan dio udari, musika, babarrunak eta bertoko produktuak lagun
Iraganeko ohitura da Olarizukoa. Hiria mugatzen zuten mugarriak ikuskatzen hasi ziren agintariak, inguruko herriek lurra lapurtu ez zitzaten. XIX. mendearen erdialdean gertatu zen hori, eta gaur egun erromeria herrikoi bihurtu da tradizioa.
Emakume bat ikerketapean dago, Bilbon adingabe bat bahitzen saiatzeagatik
Adingabea lagunekin ari zen jolasten, eta banku batean eserita zegoen emakume bat hurbildu zitzaien. Senidea zela esanda, adingabea besotik heldu eta berarekin eramaten saiatu zen. Gurasoen lagun batzuek gertatutakoa ikusi zuten, eta adingabeari galdetu zioten emakumea ezagutzen ote zuen.
EHUk uste du lehendakariak ez diola "behar besteko balioa eman unibertsitate publikoari" ikasturte hasierako ekitaldian egoteari muzin eginez
Horixe adierazi du Ixone Fernandez de Labastida Arabako Campuseko errektoreordeak Radio Vitorian egindako elkarrizketa batean, Imanol Pradales lehendakariak ikasturte hasierako ekitaldietan Mondragon, Deustu eta EHU txandakatzeko hartu duen erabakiaren harira.