Osasun sailburuak akatsa onartu du iraungitako txertoen inguruan, eta berriro txertatu behar ote diren aztertzen ari dira

Alberto Martinez Eusko Jaurlaritzako Osasun sailburuak onartu du "akats larria" izan dela iraungitako txertoak ematerakoan eta, orain, aztertzen ari dira komenigarria den ala ez kaltetuak berriro txertatzea. Izan ere, gaur Espainiako Medikamentuaren Agentziak ez du gomendatu den-denak berriz txertatzea, baizik eta helduak bakarrik. 

Osakidetza-Euskal Osasun Zerbitzuak 253 pertsonari eman dizkie iraungitako txertoak, gehienak haurtxoak. Sailburuak berretsi duenez, horrek ez du osasunean eraginik, ezta albo-kalterik ere.

Txertoen Euskal Aholku Batzordeak erabakia zuen kaltetutako pertsonak berriz txertatzea, baina Sendagaien Espainiako Agentziatik gaur iritsi den txosten batek gomendatu du haurrak berriro ez txertatzea eta iraungitako txertoa hartu zuten bost helduei baino ez jartzea berriro txertoa. 

Prentsaurreko batean, sailburuak onartu du hainbat kontrolek huts egin dutela: biltegi banatzaileak, txertoak jaso zituzten osasun-zentroek eta horiek eman zituzten erizainek (50 baino gehiago).

AEMPSren ondorioak

AEMPSk argitaratutako oharraren arabera, "antigenoen egonkortasunari buruzko datuak aztertu eta eskura dagoen informazioa teknikoki berrikusi ondoren", AEMPSek ondorioztatu du ez dela beharrezkoa Vaxelis lehen aldiz jaso duten bularreko haurrei txertoa berriro jartzea, ezta iraungitako txertoa oroitzapen dosi gisa inokulatu zaien haurrei ere.

Bularreko umeei dagokienez, Agentziak ziurtatu duenez, "ez da beharrezkoa, 2 edo 4 hilabeterekin X019675 loteko dosi bat aurreneko dosi gisa jaso duten haurtxoak berriz txertatzea. Txertoaren potentzia egokia izatea eta erantzun immunologiko osoa normaltasunez mantentzea espero da, lehen txertaketa zikloaren ondoren", dio Agentziak.

Horren arabera, "ez da beharrezkoa 11 eta 12 hilabete bitartean oroitzapen-dosia jaso zuten bularreko haurrak berriz txertatzea ere, txertoak memoria immunologiko nahikoa sortzen baitu babesa bermatzeko".

Pertsona helduei dagokienez, Agentziak adierazi duenez, "Vaxelis txertoa zergatik jarri ote zaien ezagutzen ez den arren, mediku arduradunek kasu bakoitza baloratzea berrestea gomendatzen du, paziente bakoitzaren osasun egoeraren eta arriskuaren arabera. Beharrezkotzat joz gero, dosi berria aurreko dositik gutxienez hilabeteko tartearen ondoren eman beharko litzateke" argitu du.

Hala ere, txertaketari buruzko azken erabakia Txertoen Euskal Aholku Batzordeak izango du, zeinak ez duen oraindik horren inguruko adierazpenik egin.