Osasun sailburuak onartu du iraungitako txertoekin akatsa egin dutela, eta adierazi du txertoak berriro jarri behar diren ala ez aztertzen ari direla

Alberto Martinez Eusko Jaurlaritzako Osasun sailburuak onartu du "akats larria" izan dela iraungitako txertoekin, eta adierazi du orain aztertzen ari direla komenigarria den ala ez kaltetuak berriro txertatzea. Izan ere, gaur Sendagaien Espainiako Agentziak ez du gomendatu den-denak berriz txertatzea, eta soilik helduei jartzea komeni dela adierazi du.

Osakidetza-Euskal Osasun Zerbitzuak 253 pertsonari eman dizkie iraungitako txertoak, gehienak haurtxoak. Sailburuak esan duenez, ez da kaltegarria osasunerako, eta albo-kalterik ere ez du eragingo.

Txertoen Euskal Aholku Batzordeak erabakia zuen kaltetutako pertsonak berriz txertatzea, baina Sendagaien Espainiako Agentziak gaur igorri duen txostenean gomendatu du haurrak berriro ez txertatzea eta iraungitako txertoa hartu zuten bost helduei baino ez jartzea berriro txertoa. 

Prentsaurreko batean, sailburuak onartu du hainbat kontrolek huts egin dutela: biltegi banatzaileak, txertoak jaso zituzten osasun-zentroek eta jarri zituzten erizainek (50 baino gehiago).

Sendagaien Espainiako Agentziaren iritzia

Agentziak argitaratutako oharraren arabera, "antigenoen egonkortasunari buruzko datuak aztertu eta eskura dagoen informazioa teknikoki berrikusi ondoren", ondorioztatu du ez dela beharrezkoa Vaxelis lehen aldiz jaso duten haurtxoei txertoa berriro jartzea, ezta iraungitako txertoa oroitzapen-dosi gisa hartu duten haurrei ere.

Bularreko umeei dagokienez, Agentziak ziurtatu duenez, "ez da beharrezkoa, 2 edo 4 hilabeterekin X019675 loteko dosi bat aurreneko dosi gisa jaso duten haurtxoak berriz txertatzea. Txertoaren potentzia egokia izatea eta erantzun immunologiko osoa normaltasunez mantentzea espero da, lehen txertaketa zikloaren ondoren", dio Agentziak.

Horren arabera, "ez da beharrezkoa 11-12 hilabete zituztela oroitzapen-dosia jaso zuten bularreko haurrak berriz txertatzea ere, txertoak memoria immunologiko nahikoa sortzen baitu babesa bermatzeko".

Pertsona helduei dagokienez, Agentziak adierazi duenez, "Vaxelis txertoa zergatik jarri ote zaien jakin ez dakigun arren, mediku arduradunek kasuan kasu zer erabaki hartzea gomendatzen dugu, pazienteen osasun egoeraren eta arriskuaren arabera. Beharrezkotzat joz gero, beste dosiaren eta lehenaren artean gutxienez hilabeteko tartea izan behar da" argitu du.

Hala ere, txertaketari buruzko azken erabakia Txertoen Euskal Aholku Batzordeak izango du, eta ez du horren inguruko adierazpenik egin oraingoz.