Euriteak baretu dira Andaluzian, azken egunotako ekaitzak igarota

Andaluzian euriteak baretu egin dira igande goizean, Leonardo eta Marta ekaitzak igaro ostean. Prezipitazioak nabarmen murriztu dira, eta eguraldiak hobera egin du. Hala ere, astelehenetik aurrera fronte gehiago iritsiko dira autonomia erkidegora.

Horrela, eguraldi ezegonkorra gailenduko da berriro. Meteorologia zerbitzuek ohartarazi dutenez, igande goizean nagusi den barealdia behin-behinekoa izango da, eta datozen egunetarako egindako iragarpena ikusita, adi egoteko gomendatu dute.

Etxera itzultzeko aukera izan dute zenbaitzuk

Igande honetan euriteek emandako arnasaldiari esker, etxera itzultzeko aukera izan dute batzuek. Guztira, 11.000 lagunek utzi behar izan dituzte beren etxebizitzak denboralearen eraginez.

Cadizko El Puerto de Santa Maria herrian dagoen Doña Blanca auzoko 660 bizilagunak etxera itzultzen hasi dira jada, Udalak Andaluziako Juntari larrialdi-maila jaisteko eskatu ostean. Guadalete ibaiak inguruan eragindako kalte materialak aztertu ostean hartu dute erabakia.

Denboraleak eragindako kalte materialak

200 errepide inguruk denboralearen ondorioak jasan dituzte Andaluzian. Kalte materialak 500 milioi euro ingurukoak dira, eta oraindik 148 errepide daude itxita. Horrek hainbat udalerri utzi ditu inkomunikatuta.

Eskolara joan ezin diren umeak ere badira, eta denda askotan salgairik gabe daude, kamioiak ezin direlako iritsi.

Nekazariek ere galera izugarriak izango dituzte. Lurren % 75 urak hartuta daude, eta olibaren, zainzurien edota sandiaren uztak galtzear.

Abeltzainen kasuan ere arazoak dituzte animaliengana heltzeko.

Horrek guztiak erakusten du kalte ekonomikoak oso-oso larriak izango direla, nahiz eta oraindik ezinezkoa den zenbaterainoko kalteak izango dituzten aurreikustea.